गांव के बिहतरा घर म एसडीएम के छापा अउ जुर्माना..., काश अइसने नेता मनके कार्यक्रम म तको होतिस !

अंजोर.नारायणपुर, 29 अप्रैल 2021। कोरोना महामारी के संक्रमण ल देखत जिला म पूरा लॉक डाउन लगाये गे हावय। जरूरी सेवा ल छोड़के सबो दुकान अउ व्यवसायिक संस्थान बंद हावय। सबो रकम के सभा, जुलूस, सामाजिक, धार्मिक अउ राजनैतिक आयोजन ल प्रतिबंधित करे गे हावय। बिहाव वर या वधू के घर म ही करे अउ शामिल होवइया मनखे मन के संख्या 20 निर्धारित करे गे हावय। येकरे संग अंत्योष्टि, दशगात्र अउ मृत्यु संबंधी कार्यक्रम म अधिकतम संख्या भी 20 निर्धारित की गे हावय। 

मिले आरो के मुताबिक जिला कलेक्टर के निर्देश के मुताबिक पूरा नारायणपुर जिला म प्रशासन डहर ले पूरा मुस्तैदी के संग लॉकडाउन के पालन करवाया जात हावय। कोरोना संक्रमण के फैले ले रोके के खातिर लॉकडाउन के तहत जारी निर्देश के प्रति प्रशासन खूब सतर्क हावय। एसडीएम के नेतृत्व म संयुक्त टीम डहर ले जिला म होत सामाजिक कार्यक्रम म छापेमारी कार्यवाही करे जात हावय। एसडीएम दिनेश कुमार नाग कोति ले बताये गे हावय के संयुक्त टीम डहर ले 5 बिहाव कार्यक्रम जेमा नारायणपुर नगरीय क्षेत्र के कुम्हारपारा म 2, बुधवारी बाजार पारा म 1 अउ ग्रामीण क्षेत्र म देवगांव अउ गुरिया म छापेमारी के कार्यवाही करे गिस। जेमा कुम्हारपारा, बुधवारी बाजार पारा अउ गुरिया म आयोजित वैवाहिक कार्यक्रम म लोगन डहर ले शासन के जारी गाईड लाईन के पालन करे रिहिन। उहें देवगांव म वैवाहिक कार्यक्रम म लगभग 150-200 लोगन शामिल होए रिहिस, जेन म चालानी कार्यवाही करत बिहाव आयोजित करइया मनखे ल 25 हजार अउ डीजे संचालक ल 10 हजार रूपिया के जुर्माना करे गे हावय। एसडीएम दिनेश कुमार नाग ह किहिन के जिला प्रशासन डहर ले जारी गाईड लाईन के पालन नइ करे वाला म कार्यवाही नियमित जारी रइही। ग्रामीण क्षेत्र म कोरोना फैले के प्रमुख कारण वैवाहिक अउ आन सामाजिक कार्यक्रम म लोगन डहर ले बरते गे लापरवाही हावय। ओमन ए सब कार्यक्रम म सीमित संख्या रखत मास्क के उपयोग, हाथ ल सेनेटाईज अउ सोशल अउ फिजिकल डिस्टेंसिंग बनाये रखे के अपील करे हावय।

जीव लेवा बीमारी ले एक डहर दुनिया म हाहाकार मचे हावय अउ दूसर कोति एक बिहाव घर म 100 ले आगर लोगन मनके सकलाना बने नोहय। आम जनता अउ सामजिक कार्यकर्ता मन अइसन कार्यवाही के समर्थन करत हावय। फेर लोगन के मन म अइसन सवाल तको हावय के कोरोना के कहर पाछु एक साल ले देश म संचरे हावय अउ ये बीच छोटे अउ मंझोलन मनखे मन ही सबसे जादा दुख पीरा सहत हावय, बड़े मन अपन सबो काम बुता ल उरका लेथे। लोगन मन यहू काहत हावय के गांव के बिहाव अउ मरनी ले जादा शहर के नेता मनके कार्यकम म लोगन मनके भीड़ सकलाथे, शहर म बड़हर मन बीमारी ल बड़ाथे अउ गरीब मनके गर म लॉकडाउन के फांसी अरो देथे। बिहातरा घर ले कोरोना के संक्रमण बाड़त हावय त 40000 हजार के भीड़ वाले क्रिकेट मैंच, नेता मनके जनसभा, चुनावी रैली ले तको तो बगरत हावय।