अंजोर.कोरबा। आन आन ठउर ले गवांये आम जनता के माहंगी-माहंगी मोबाइल ल मिले के बाद कोरबा पुलिस कोति ले मालिक ल वापिस करे जात हावय। पुलिस कोति ले मिले आरो के मुताबिक कोरबा जिला के नवा सायबर सेल भवन के उद्घाटन के मउका म पुलिस अधीक्षक कोरबा, अतिरिक्त पुलिस डहर ले मोबाईल मालिक के गवाये 32 नग मोबाइल ल सायबर सेल के अथक प्रयास ले वितरण करे गे रिहिस।
अइसने जनवरी के बाद ले सायबर सेल कोरबा के करीब 80 मोबाइल गुम के आवेदन मिले हावयं जेमे ले 60 मोबाइल के सायबर सेल टीम डहर ले 02 महीना के भीतर राज्य के दुर्ग, बिलासपुर, रायगढ़ अम्बिकापुर, सूरजपुर, जांजगीर चाम्पा, मुंगेली अउ आन क्षेत्र ले ट्रेस करके बरामद करे गे हावय। बांचे मोबाईल मनके पतासाजी करे जात हावय। अब तक बरामद करे गे मोबाइल म वीवो, रेडमी, सैमसंग, रियलमी, एमआई, ओप्पो जइसे माहंगा मॉडल के मोबाइल शामिल हावय। जेकर जुमला कीमत करीबन 10,00000/-रूपये हावय। कोविड प्रोटोकॉल के ध्यान म रखत पुलिस अधीक्षक कार्यालय कोरबा म अलग-अलग समय म मोबाईल धारक ल मोबाईल के वितरण समय 12.00 बजे ले 14.00 बजे तक वरिष्ठ अधिकारी मन डहर ले करे जाही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।