अंजोर.कांकेर। सार्वजनिक जगह म मास्क या फेसकवर नइ लगइया मनखे मन के विरूद्ध जिला प्रशासन डहर ले लगातार चालान के कार्यवाही करत अर्थदण्ड ले दण्डित करे जात हावय। सार्वजनिक ठऊर मन म मास्क नइ लगइया 4684 मनखे मन ले 27 फरवरी ले 18 अप्रैल तक 10 लाख 09 हजार 190 रूपिया के वसूली करे गे हावय। नगर पालिका क्षेत्र कांकेर म 959 मनखे मन के विरूद्ध चालान के कार्यवाही करके 01 लाख 76 हजार 01 सौ रूपिया वसूल करे गे हावय।
इही रकम ले नगर पंचायत नरहरपुर म 178 मनखे मन ले 61 हजार 150 रूपिया, नगर पंचायत चारामा म 598 मनखे मन ले 01 लाख 43 हजार 07 सौ रूपिया, नगर पंचायत पखांजूर म 1137 मनखे मन ले 03 लाख 24 हजार 08 सौ रूपिया, नगर पंचायत भानुप्रतापपुर म 983 मनखे मन ले 01 लाख 71 हजार 810 रूपिया अउ नगर पंचायत अंतागढ़ म 829 मनखे मन के विरूद्ध चालान के कार्यवाही करके 01 लाख 31 हजार 630 रूपिया के वसूली करे गे हावय।
ये सब के बीच सबले बड़का सवाल आम जनता के मन म आथे के, का ये हर्जाना सिरिफ आम आदमी ले ही वसूली जाही या खास मन ल तको येकर पालन कराये के कोनो नियम हाबे। ये उही अफसर आए जेन आम आदमी ले सक्ती के साथ अर्थदण्ड वसुली करत हाबे, उही मन कुछ दिन पहिली एक अइसे बड़का चेहरा ल सलामी ठोकत रिहिस जेन बिगर मास्क के दिल्ली ले अइस गिस। का कोनो उनला बिगर मास्क के आत-जात नइ देखिस। यदि कोनो उनला बिगर मास्क के नइ देखिस तव कम से कम ओमन सोशल मीडिया म फोटो तो देखिन होही के कइसे बिगर मास्क के नियम ल ठेठा देखा के चल दिस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।