अंजोर.रायपुर। रायपुर जिला के प्रभारी मंत्री श्री रविंद्र चौबे अउ स्वास्थ्य मंत्री श्री टी एस सिंहदेव ह न्यू सर्किट हाउस म कोरोना संक्रमण के रोकथाम बर राज्य शासन के वरिष्ठ अधिकारी मनके बइठक लिस अउ स्वास्थ्य विभाग, जिला प्रशासन, पुलिस प्रशासन अउ आन संबंधित विभाग डहर ले करे जात बुता मनके समीक्षा भी करिन। स्वास्थ्य मंत्री श्री सिंहदेव ह किहिन के पूरा देश सहित अपन प्रदेश म कोरोना संक्रमण के मामला बढ़त हावय। विभाग ह पाछू साल भी ए म काबू पाये के सबो उपाय करे रिहिस अउ सफल भी रिहिस। अब फेर उन्ही गाइडलाइन्स ल कड़ाई ले पालन करे के जरूरत हावय, विशेष करके रायपुर, दुर्ग अउ बेमेतरा जिला म जिहां पॉजिटिव मरीज मनके संख्या बढ़त हावय। एला रोके के खातिर टेस्टिंग बढ़ाये, कान्टेक्ट ट्रेसिंग बढ़ाये के निर्देश दिस।
जादा आक्सीजीनेटेड बेड के उपलब्धता भी सुनिश्चित करे जाए, संग ही होम आइसोलेशन म रहत मरीज मनके समुचित मानिटरिंग की जाए अउ समय म ओला दवाई मिल जाए,यहू भी जरूरी हावय। टीकाकरण के बुता अच्छा होत हावय अउ सरकारी केन्द्र म सेशन साइट संचलित करे के संबंध म राज्य के स्थान देश म चौथा हावय। कृषि मंत्री अउ रायपुर जिला के प्रभारी मंत्री रविंद्र चैबे ह सबो विभागीय अधिकारी मन के कठिन परिस्थिति म समर्पित भाव ले बुता करे के खातिर सराहना करत किहिन के परिस्थिति अनुरूप जिला के कलेक्टर डीएमएफ अउ सीएसआर मद के राशि के उपयोग कर सकत हावय। ओमन किहिन के कंटेनमेंट जोन म नियम के जादा कड़ाई ले पालन हो अउ नियमित रूप ले पुलिस के पेट्रोलिंग हो। बिना मास्क के सार्वजनिक जगह म आने वाला लोगन ले चालान काट करके फाइन वसूले जाए।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।