अंजोर.रायपुर 21 अप्रैल 2021। मुख्यमंत्री दाऊ भूपेश बघेल ह घोषणा करे हावय के छत्तीसगढ़ म 18 साल ले जादा उमर के सबो लोगन ल फोकट म कोरोना वैक्सीन लगाये जाही। 18 साल ले जादा उमर के लोगन ल कोरोना के टीकाकरण के भुगतान राज्य सरकार करही। मुख्यमंत्री बघेल ह किहिन के अपन नागरिक मनके जीवन के रक्षा खातिर हम हरसंभव कदम उठाबोन। मुख्यमंत्री बघेल ह केंद्र सरकार ले अनुरोध करे हावय के छत्तीसगढ़ म पर्याप्त संख्या म वैक्सीन के उपलब्धता सुनिश्चित करें।
मुख्यमंत्री बघेल ह कोविड टीकाकरण के खातिर पात्र सबो हितग्राही ले अपील तको करे हावय के ओमन अगर अब तक टीकाकरण नइ कराये हावय तो ज़रूर करा लें, जेकर ले वो संक्रमण ले होए वाला गम्भीर बीमारी ले बच सकही। जानबा होवय के 45 साल ले जादा उमर समूह के कोविड 19 वैक्सीन के पहिली डोज़ दे म छत्तीसगढ़ राज्य के ठऊर पूरा देश म चौथा हावय। कहू साठ साल अउ ओकर ले जादा आयुवर्ग के बात करें तो छत्तीसगढ़ पूरा देश म लद्दाख, राजस्थान, सिक्किम अउ त्रिपुरा के बाद पाँचवां ठऊर म हावय। 88 प्रतिशत हेल्थ केयर वर्कर, 92 प्रतिशत फ्रंट लाइन वर्कर ल भी वैक्सीन के पहिली खुराक दे जा चुके हावय। छत्तीसगढ़ म अब तक 51 लाख 25 हज़ार 640 कोरोना वैक्सीन के डोज़ के उपयोग करे गे हावय। प्रदेश म अब तक पहिली अउ दूसरा डोज मिलाके कुल 50 लाख 55 हजार 698 डोज लगाए जा चुके हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।