कोण्डागांव जिला के मर्दापाल म खुलिस उप तहसील कार्यालय

अंजोर.कोण्डागांव। प्रदेश म लोगन मनके सुविधा खातिर राजस्व प्रशासन ल सहज अउ सुलभ बनाये जात हावय। लोगन के राजस्व संबंधी काम उंकर निवास के नजदीक हो जाए, येकर बर राजस्व प्रशासन के नवा ईकाइ सुरू करे हावय। इही कड़ी म कोण्डागांव जिला के मर्दापाल म उप तहसील के शुभारंभ नारायणपुर के विधायक अउ छत्तीसगढ़ हस्तशिल्प विकास बोर्ड के अध्यक्ष चंदन कश्यप ह करिन। जानबा होवय के 51 हजार ले आगर जनसंख्या वाला ये नवा उप तहसील म 45 ग्राम पंचायत अउ दू राजस्व निरीक्षक मंडल गोलावंड अउ मर्दापाल सामिल हाबे। जेकर अंतर्गत 19 हल्का अउ 78 आश्रित ग्राम तको शामिल होही।

तहसील शुभारंभ के मउका म चंदन कश्यप ह किहिन के मर्दापाल अउ आस-पास के गांव कई साल ले पहाड़ी-जंगल अउ संवेदनशील क्षेत्र होवे के कारण विकास के धीमी गति ले जूझत रेहे हावय। क्षेत्र के ग्रामीण ल अपन छोटे-छोटे कार्य के खातिर जिला मुख्यालय तक बार-बार आना पड़य। जेमा ओमन ल गजब परेशानी होवय। मर्दापाल म उप तहसील कार्यालय स्थापित होए ले अब ग्रामीण मनके आय, जाति, निवास आदि प्रमाण पत्र अउ नामांतरण, बटवारा, सीमांकन के कार्य उप तहसील के माध्यम ले ही पूरा हो जाही। ओमन ल येकर खातिर मुख्यालय म जाये के जरूरत नइ होही, मर्दापाल के विकास होवे लगही। ये मउका म जिला पंचायत के अध्यक्ष देवचंद मातलाम, कलेक्टर पुष्पेन्द्र मीणा, जनपद अध्यक्ष शिवलाल मंडावी सहित जिला के आन जनप्रतिनिधि अउ अधिकारी उपस्थित रिहिन।