राजिम माघी पुन्नी मेला 27 फरवरी ले 11 मार्च तक भराही

अंजोर.गरियाबंद। छत्तीसगढ़ के सबले बड़का मेला राजिम के तिरबेनी घाट म भरइया ह एसो घलोक धूमधाम ले भराही। फेर आन बछर सहिक बाहिर के भर्रासाही नी होवय। पौराणिक अउ धार्मिक नगरी राजिम म भरइया मेला यहू पइत माघी पुन्नी ले महाशिरात्रि तक भराही। इही ओढ़र म आज प्रदेश के धमस्व मंत्री ताम्रध्वज साहू ह तिरबेनी पैरी नदी अउ सोंढूर नदी संगम म पहुंच के राजिम माघी पुन्नी मेला के तियारी ल देखिन। 

मिले आरो के मुताबिक मेला के शुरूआत 27 मार्च के धर्मस्व मंत्री अउ गरियाबंद जिला के प्रभारी मंत्री ताम्रध्वज साहू संग छत्तीसगढ़ विधानसभा के अध्यक्ष डॉ. चरणदास महंत के पहुनई म करे जाही। ये मउका म बिसेस रूप ले पंचायत अउ ग्रामीण विकास मंत्री टी.एस. सिंहदेव, स्कूल शिक्षा मंत्री डॉ. प्रेमसाय सिंह टेकाम, वाणिज्य, उद्योग मंत्री कवासी लखमा, संस्कृति मंत्री अमरजीत भगत, विधानसभा के नेता प्रतिपक्ष धरमलाल कौशिक, लोकसभा सांसद चुन्नीलाल साहू अउ सुनील सोनी, सहित केऊ अऊ नेता मन जुरियाही। पंदरा दिन के जबर मेला म राजिम म आन-आन कोति ले बड़का साधु संत मनके प्रवचन अउ संत-समागम के संग मेला देखइया मन खातिर सांस्कृतिक कार्यक्रम के तको आयोजन करे गे हावय।