22 जिला म 27 फरवरी के एके संघरे 3 हजार 300 जोड़ी के होही बिहाव, मंत्रीमंडल ऑनलाइन देही आसीस

अंजोर.रायपुर। महिला अउ बाल विकास विभाग कोति ले ‘मुख्यमंत्री कन्या विवाह योजना’ ले 27 फरवरी के प्रदेश के 22 जिला म एक साथ सामूहिक बिहाव के आयोजन करे गे हावय। एसो कोरोना महामारी ल देखत बिहाव के ठउर ल आन-आन कोति करे जाही। अउ सबो मिलाके कुल 3 हजार 300 जोड़ी के बिहाव के आरो मिले हाबे। ये पइत मुख्यमंत्री भूपेश बघेल सहित मंत्रीमंडल के सदस्य, सांसद, विधायकगण अउ जनप्रतिनिधि मन रायपुर के सरदार बलवीर सिंह जुनेजा इंडोर स्टेडियम परिसर म आयोजित मुख्यमंत्री कन्या विवाह आयोजन म शामिल होही अउ उहंचे ले पहिली बार डिजीटल माध्यम ले आन-आन जिला म बिहाव होए दुल्हा दुल्हिन ल आर्शीवाद देही।

ये मउका म छत्तीसगढ़ ल सामाजिक समरसता ल बढ़ात अलग-अलग धर्म के परिवार जुटही अउ राजधानी म 3 इसाई, 1 मुस्लिम, 236 साहित 240 जोड़ा मनके बिहाव उंकर अपन रीति-रिवाज ले संपन्न होही। गरीब परिवार के बेटी के बिहाव के फिकर करत, अउ फिजूलखर्ची ल सामूहिक विवाह के माध्यम ले कम करे खातिर मुख्यमंत्री कन्या विवाह के तहत बिहाव के पूरा खर्चा राज्य सरकार करथे। बेटी मनके बिहाव म कोनो प्रकार के कमी झिन राहय येला देखत योजना के राशि 15 हजार ले बढ़ाके 25 हजार कर दे हावय। जेमा ले 20 हजार रूपिया तक के सामग्री वर-वधू ल प्रदान करे जाही अउ बांचे 5 हजार रूपिया वैवाहिक कार्यक्रम के आन खर्च कर होही।