डॉ. खूबचंद बघेल के मूर्ति लगही नवा रायपुर म, छत्तीसगढ़ राज के सपना देखइया पुरखा के 20 साल बाद सुध लिस सरकार

अंजोर.रायपुर। अलग छत्तीसगढ़ के राज के सपना जगइया, आजादी के जोइदा पुरखा डॉ. खूबचंद बघेल के पुण्यतिथि के मउका प्रदेश के मुखिया ह उंकर जनम भुइंया म सुमिरन करत किहिन के डॉ. खूबचंद बघेल न सिर्फ छत्तीसगढ़ के स्वप्न दृष्टा रिहिस बल्कि छत्तीसगढ़ के स्वाभिमान के प्रतीक रिहिन। वो मन चाहत रिहिसे के छत्तीसगढि़या स्वाभिमान ले जीये, स्वावलंबी होवय अउ जीवन के सबो क्षेत्र म उंकर विकास होवय। डॉ. खूबचंद बघेल छत्तीसगढ के अस्मिता अउ सामाजिक कुरीति के खिलाफ जीवन भर संघर्ष करिन। वो मन छत्तीसगढ़ी संस्कृति ल बढ़ावा दे के प्रबल पक्षधर रिहिसे। डॉ. खूबचंद बघेल ह शिक्षा, सहकारिता के क्षेत्र सहित सामाजिक आंदोलन म महत्वपूर्ण भूमिका निभान। 1967 म छत्तीसगढ भ्रातृ संघ के गठन करे रिहिस। ये मउका म ओमन ग्राम पथरी के सड़क ल टू-लेन बनाये अउ नवा रायपुर के मुख्य चौक म डॉ. बघेल के आदमकद मूर्ति स्थापित करे के घोषना करिस।

कार्यक्रम प्रदेश के कृषि मंत्री रविन्द्र चौबे ह किहिन के पुरख के सपना ल पूरा करे खातिर सरकार प्रतिबद्ध हावय। किसान मनके हित के खातिर सबो संभव प्रयास करे जावत हावय। सरकार ह राजीव गांधी किसान न्याय योजना के तहत किसान ल अदान सहायता के रूप म प्रोत्साहन राशि देत हावय। गौठान के माध्यम ले लोगन ल रोजगार के अवसर उपलब्ध कराये जात हावय। गोबर खरीदी करके महिला स्व-सहायता समूह के माध्यम ले वर्मी कम्पोस्ट के साथ ही आन आयमूलक गतिविधि म रोजगार उपलबध कराये जाथे।    

मुख्यमंत्री ह ये मउका म स्वतंत्रता संग्राम सेनानी के वंश मनला सम्मानित करिन। जेमा विशेष रूप ले स्थानीय विधायक श्रीमती अनिता योगेंद्र शर्मा, कार्यक्रम म खनिज विकास निगम के अध्यक्ष गिरीश देवांगन, राज्य महिला आयोग के अध्यक्ष डॉ. किरणमयी नायक, पूर्व विधायक बलौदाबाजार जनक वर्मा, जिला पंचायत अध्यक्ष श्रीमती डोमेश्वरी वर्मा, जनपद अध्यक्ष श्रीमती उत्तरा कमल भारती, ग्राम पथरी के सरपंच श्रीमती प्रीति सोनी संग गांववाले मन जुरियाए रिहिन।