मंहगा ब्राण्ड के अंग्रेजी संग मध्यप्रदेश के दारू के अवैध कारोबार करइया गिरफ्तार

अंजोर.रायपुर। राज्य म आबकारी विभाग कोति ले आन प्रान्त ले छत्तीसगढ म अवइया अवैध मदिरा के धरपकड़ बर अभियान चलाये जात हावय। इही कड़ी म बिलासपुर जिला म तीन अलग-अलग मामला म चार आरोपी के गिरफ्तारी करे गे हावय। मिले आरो के मुताबिक मंहगा ब्राण्ड के विदेशी मदिरा सहित मध्यप्रदेश के लेबल वाला 7 पेटी गोवा स्पेशल मदिरा जब्त करे हावय संग म शराब के अवैध परिवहन म करत एक्टिवा अउ सेन्ट्रो कार के तको जब्ती होए हाबे।

आबकारी विभाग के टीम ह बिलासपुर के नेहरू नगर निवासी मनोज खन्ना पिता गोवर्धन खन्ना ले रेड लेबल के 01 पेटी अउ 2 लाख 27 हजार 106 रूपिया के मंहगा ब्राण्ड के विदेशी मदिरा बरामद करे हावय। गणेश कुमार जैन पिता रामानंद जैन उम्र 35 वर्ष अउ अमित कुमार यादव पिता कृष्णाअवतार यादव ल तको अवैध शराब के मामला म गिरफ्तार करे गे हावय। आरोपी गणेश कुमार जैन सीआरपीएफ ल 65वीं बटालियन के सिपाही हावय बताये हे जेन ह रायपुर के सीआरपीएफ महानिरीक्षक कार्यालय पदस्थक हावय। गणेश कुमार जैन ह सीआरपीएफ के वर्दी ल ढाल बनाके जांच चैकी अउ नाका ले अवैध शराब ले भरे वाहन ल पार करावय। अइसने पचपेड़ी थाना क्षेत्र म श्रीमती सरोजनी बाई सोनी पति नंदकुमार सोनी के घर म रखे 07 पेटी मध्यप्रदेश म विक्रय लेबल लगे गोवा स्पेशल मदिरा के जब्ती करके गैर जमानतीय प्रकरण कायम करे गे हावय।