छत्तीसगढ़ के जनजातिय जीवनशैली ले जुरे फोटो हैण्डबुक के होइस विमोचन

अंजोर.रायपुर। मुख्यमंत्री भूपेश बघेल ह आज अपन निवास कार्यालय म राज्य के जनजातिय जीवनशैली, उंकर परिचय, उत्पत्ति अवधारणा, आवास अउ बसाहट, सामाजिक संगठन अउ संस्कृति म प्रकाशित फोटो हैण्डबुक के विमोचन करिन। जेमा आदिमजाति कल्याण मंत्री डॉ.प्रेमसाय सिंह टेकाम तको इस अवसर म उपस्थित रिहिन।

छत्तीसगढ़ आदिमजाति अनुसंधान अउ प्रशिक्षण संस्थान कोति ले ये फोटो हैण्डबुक के प्रकाशन करे गे रिहिसे, जेमा राज्य के जनजातिय "छायांकित अभिलेखीकरण श्रृंखला" अन्तर्गत 29 जनजातीय समुदाय खड़िया, दण्डामी माड़िया, दोरला, हलबा, मुरिया, धुरवा, परजा, भतरा, गोंड (कबीरधाम), सवरा, धनवार, कंवर, उरांव, मझवार, नगेसिया, मुण्डा कोल, राजगोंड, अगरिया, पारधी, बिंझवार, भैना, बियार, कोंध, गोंड (बस्तर), खैरवार, सौंता भारिया अउ कण्डरा के बारे म जानकारी दे गिस। फोटो हैंड बुक म जनजाति के परिचय उत्पत्ति अवधारणा, उंकर आवास अउ बसाहट, सामाजिक संगठन, आर्थिक जीवन, जन्म संस्कार, विवाह संस्कार, मृत्यु संस्कार, धार्मिक जीवन, ओमा प्रचलित न्याय व्यवस्था, लोक परम्परा उंकर वस्त्र आभूषण, गोदना, घरेलु उपकरण, कृषि उपकरण, शिकार, मत्स्याखेट उपकरण, वनोपज आधारित जीवनशैली के साथ संग उंकर समग्र विकास खातिर करत शासकीय प्रयास ल आकर्षक छायाचित्र के जरिए दर्शाए गे हावय। 

ये फोटो हैण्डबुक म प्रकाशित तथ्य राज्य के संबंधित जनजातीय समुदाय, जनजातीय संस्कृति म रूचि रखइया अध्येता मन खातिर अउ आदिवासी संस्कृति के संरक्षण अउ संवर्धन बर बड़ उपयोगी होही। ये मउका म प्रभारी मुख्य सचिव सुब्रत साहू, मुख्यमंत्री के सचिव सिद्धार्थ कोमल परदेशी, आदिमजाति कल्याण विभाग के सचिव डी. डी. सिंह, वित्त विभाग के सचिव श्रीमती अलरमेलमंगई डी, संचालक आदिम जाति विभाग श्रीमती शम्मी आबिदी उपस्थित जुरियाए रिहिन।