अंजोर.बालोद। बालोद जिला के गुरूर थाना के गांव छेडि़या म होए एक महिला के हत्या के मामला ल पुलिस ह 24 घंटा के भीतर सुलझाइस। मिले आरो के मुताबिक थाना गुरूर पुलिस ल सूचना मिलिस के ग्राम छेडिया म पूर्णिमा बाई ठाकुर पति सेवाराम ठाकुर उम्र 40 के अज्ञात व्यक्ति ह हत्या कर दे हावय। तत्काल मउका म पहुंचके पुलिस ह धारा 302 भा.द.वि. के अपराध दर्ज करके विवेचना म लिस अउ मृतिका के शव के पंचनामा कार्यवाही करके पोस्टमार्टम कराये गिस। आगू कार्यवाही करत वरिष्ठ पुलिस अधीक्षक जितेन्द्र सिंह मीणा के मार्गदशन अउ अतिरिक्त पुलिस अधीक्षक डी.आर.पोर्ते, उप पुलिस अधीक्षक दिनेश सिन्हा के निर्देशन म थाना प्रभारी गुरूर निरीक्षक अरूण नेताम अउ थाना गुरूर के स्टाफ संदेही मनले पूछताछ सुरू करिन।
बारिकी ले तस्दीक जांच करे म मृतिका के हत्या ओकर सौतेला बेटा शैलेन्द्र कुमार ठाकुर उम्र 24 के घटित करे के संभावना म, घटना के संबंध म ओकर ले पुछताछ करे गिस पहिली तो गुमराह करिस फेर बाद म हत्या करना स्वीकार कर लिस। आरोपी ह पुलिस ल बताइन के ओकर पिता सेवाराम ठाकुर ह जब सौतेली मां पूर्णिमा ल पत्नी बनाके लानिस तव ओला ओकर पिता ले अलग कर दिस। इही सेती गुस्सा म सौतेली मां पूर्णिमा के सिर म प्राण घातक हमला करके हत्या कर दिस अउ शव ल मृतिका के कमरे म ले जाके रख दीस। पुलिस ह हत्या म उपयोग करे लोहा के सब्बल ल तको जप्त करके आरोपी ल गिरफ्तार करके न्यायिक रिमाण्ड म जेल भेज दे हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।