दर्री ल मिलिस तहसील के दर्जा, राजस्व मंत्री ह करिस तहसील कार्यालय के शुभारंभ

अंजोर.कोरबा। प्रदेश के मुखिया श्री बघेल ह प्रदेश ल 23 नवा तहसील के सौगात दीस जेमा कोरबा जिला के दर्री तको सामिल रिहिस। दर्री के नवा तहसील कार्यालय के शुभारंभ प्रदेश के राजस्व अउ आपदा प्रबंधन मंत्री जयसिंह अग्रवाल ह करिन। ये मउका म ओमन किहिन के 23 नवा तहसील के उद्घाटन के बाद कामकाज तको सुरू होगे। जिला के दर्री अउ हरदीबाजार के तहसील बने ले लोगन मन ला अब दूरिहा दूरिहा जाए बर नइ परय। समय अउ पइसा के बचत के संग योजना के लाभ तको लघियात मिलही।

ओमन आगू किहिन के कोरबा म पसान अउ बरपाली ल तको तहसील के दर्जा मिलही। जेकर ले श्यांग-लेमरू क्षेत्र के निवासी मनला के काम जल्दी होही। अइसने अजगरबहार अउ मदनपुर क्षेत्र म दू नवा उप तहसील तको बनाये जाही। नवा बने तहसील बर राज्य शासन ह भवन अउ वाहन के स्वीकृति देदे हाबे। अऊ पाली ल एसडीएम कार्यालय के सौगात तको मिलही, प्रशासनिक स्तर म येकर सबो औपचारिकता पूरा होगे हाबे। ये कार्यक्रम विशेष रूप ले कोरबा नगर निगम के महापौर राजकिशोर प्रसाद, नगर निगम के सभापति श्याम सुंदर सोनी, पूर्व सभापति दुरपाल सिंह कंवर, पार्षद सुरेन्द्र जायसवाल, श्रीकांत बुधिया, महेश भवनानी, श्रीमती सपना चौहान, जे. पी. अग्रवाल, श्रीमती कुसुम द्विवेदी के अलावा जिला प्रशासन कोति ले एडीएम श्रीमती प्रियंका महोबिया, नगर निगम कमीशनर एस. जयवर्धन सहित आन अधिकारी मौजूद रिहिस।