विश्व मत्स्य दिवस म आयोजित कार्यक्रम म सामिल होइन मुख्यमंत्री सीएम बघेल संग कृषि मंत्री श्री चौबे अउ गृह मंत्री श्री साहू

अंजोर
0


अंजोर.रायपुर। विश्व मत्स्य दिवस के मउका म आज मुख्यमंत्री निवास म एक जलसा के आयोजन करे गे रिहिस। कार्यक्रम म भूपेश बघेल जी ह दीप प्रज्जवलन के बाद निषाद, केंवट समाज के आराध्य भगवान श्री राम सहित नाव, डोंगी अउ जाल के पूजन करके कार्यक्रम सुरू करिन। जेमा मछुआरा समाज के लोगन मनके अलाव विशेष रूप ले कृषि, जल संसाधन मंत्री रविन्द्र चौबे, गृह मंत्री ताम्रध्वज साहू, संसदीय सचिव कुंवर सिंह निषाद, सुश्री शकुंतला साहू अउ विकास उपाध्याय, छत्तीसगढ़ राज्य मछुआ कल्याण बोर्ड के अध्यक्ष एम.आर. निषाद, छत्तीसगढ़ राज्य खनिज विकास निगम के अध्यक्ष गिरीश देवांगन पहुना बनके आए रिहिन।  

सीएम बघेल ह छत्तीसगढ़ मछुआरा समाज के सम्मेलन ल संबोधित करत किहिन के राज्य सरकार छत्तीसगढ़ म मछली पालन ल खेती के दर्जा देवाये के पहल करही। जेकर ले खेती-किसानी कस मछली पालन बर कोऑपरेटिव बैंक ले ब्याज मुक्त ऋण उपलब्ध कराये अउ किसान ल मिलत बिजली दर म छूट असन मछली पालन करइया निषाद, केंवट अउ ढीमर समाज के लोगन बर तको पहल करे जाही। ये मउका म 15 मछुआरा ल मोटरसायकल सह आईस बॉक्स अउ 2 मछुआरा ल ऑटो सह आईस बॉक्स के वितरण करिन। 10 मछुआ हितग्राही मनला मछुआ आवास योजना के अंतर्गत पहिली किश्त के 40-40 हजार रूपिया के अनुदान राशि के चेक तको दीस।

कार्यक्रम म कृषि अउ जल संसाधन मंत्री श्री चौबे ह किहिन के हर साल मछुआरा समाज के एक हजार नौजवान ल आईस बॉक्स सहित मोटर सायकल अनुदान म वितरित करे जाही। मछली पालन खातिर गठित मछुआ समिति म मछुआरा समाज के लोगन ही शामिल होवे, अइसे झिन होवे के मछुआरा समिति ल मछली पालन के ठेका मिले के बाद मछुआरा समाज के लोगन मन समिति म मजदूर के रूप म काम करे अउ मछली पालन के व्यवसाय के लाभ ठेकादार ल मिले। ये मउका गृह मंत्री श्री साहू ह किहिन के मछली पालन खातिर तरिया, बांध अउ तालाब केंवट, ढीमर अउ निषाद समाज के लोगन ल ही मिलना चाहि। अइसने संसदीय सचिव कुंवर सिंह निषाद ह समाज म शिक्षा के प्रचार-प्रसार के जरूरत म बल देवत किहिन के शिक्षा के बिगर कोनो समाज के तरक्की नइ हो सके।

एक टिप्पणी भेजें

0टिप्पणियाँ

सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।

एक टिप्पणी भेजें (0)

#buttons=(Accept !) #days=(20)

Our website uses cookies to enhance your experience. Check Now
Accept !