विश्व प्रसिद्ध बस्तर दशहरा : रथ खींचे खातिर 36 गांव के 400 श्रद्धालु आही, पासधारी आदमी ही खींचही रथ ल 18 ले 23 अक्टूाबर तक

अंजोर.जगदलपुर,12। बस्तर के विश्व प्रसिद्ध दशहरा उत्सव म आन बछर तो देश विदेश के लोगन मन सामिल होके माई दंतेश्वरी के आसीस पावे। फेर एसो कोरोना राई के सेती कमती लोगन के मौजूदगी म उत्सव ल मनाये जाही। समाचार एजेंसी ले मिले आरो के मुताबिक सामाजिक दूरी के साथ फूलरथ ल जगदलपुर के गोल बाजार म 18 से 23 अक्टूबर 2020 तक खींचे जाही। रथ खींचे खातिर जगदलपुर तहसील के 32 गांव अउ तोकापाल तहसील के 4 गांव के लोगन मन आथे, कुल 36 गांव ले लगभग 400 श्रद्धालु सामिल होए के आरो मिले हाबे जेमा हरेक गांव के 15 व्यक्ति लाने के लक्ष्य राखे गे हावय। 

रथ प्रचालन खातिर गांव के श्रद्धालु मनके चिनहारी करे खातिर ग्राम के पटवारी, ग्राम पंचायत सचिव अउ कोटवार के दल गठित करे हावय। जेन मन 14 अक्टूबर तक अनुविभागीय दण्डाधिकारी, जगदलपुर ल जानकारी देही। रथ प्रचालन करइया मनला दू दिन तक होम आइसोलेसन म रखे जाही। रथ प्रचालन करइया मनला ग्रामवार चिंहित करके पास दिये जाही। पासधारी व्यक्ति के ही प्रतिदिन रथ परिचालन म सहभागिता होही। चिंहित व्यक्ति ल रथ खींचे के समयावधि म अपन गृह निवास जाए के अनुमति नइ होही। ओमन ल निर्धारित आवासीय परिसर म रूकना अनिवार्य होही अउ समिति कोति ले भोजन उपलब्ध कराये जाही। जेकर बर मुख्य कार्यपालन अधिकारी, जनपद पंचायत, जगदलपुर ल नोडल अधिकारी नियुक्त करे गे हावय।