कोविड-19 के कठिन दौर म लोगन मन करत हाबे औषधि दान, रहमान अउ ताहिर अली आयुष पॉलीक्लिनिक ल दिस यूनानी दवा

राजनांदगांव.07। कोविड-19 संक्रमण के रोकथाम खातिर जनसामान्य म रोग प्रतिरोधक क्षमता बढ़ाये के प्रति जागरूकता बाढ़त हाबे। राजनांदगांव के शासकीय आयुष पॉलीक्लिनिक म यूनानी औषधि के मांग ल देखत शहर के जिम्मेदार लोग मन औषधि दान करे बर आगु आवत हाबे। इही कड़ी म एल्डरमेन एजाज उर रहमान अउ मुस्लिम यूथ प्रतिनिधि श्री सय्यद ताहिर अली कोति ले जिला आयुर्वेद अधिकारी अरविंद मरावी ल 18 हजार रूपिया के यूनानी दवा प्रदान करे गिस। 

यूनानी चिकित्सा अधिकारी डॉ. रूबीना अंसारी ह एजेंसी ल बताये हाबे के सर्दी, खांसी, बुखार, दर्द अउ इम्यूनिटी के यूनानी दवा उपलब्ध कराये गे हवय। जेकर जरूरत अभी ज्यादा पड़त हाबे। पॉलीक्लिनिक म आयुष जोशॉंदा अउ भाप सूंघे के यूनानी दवा तको नि:शुल्क बांटे जावत हाबे। श्री मरावी ह किहिन के अइसन कठिन समय म धैर्य के साथ सावधान रेहे के जरूरत हाबे। कोविड-19 के संक्रमण ले बाचे के उपाय अपनाना चाहि। दिन म कई बार गरम पानी पीना चाहि अउ हाथ धोते रहना चाहि।