नारायणपुर.08। वैश्विक महामारी कोविड 19 के संक्रमण के रोकथाम अउ बचाव खातिर जिला प्रशासन अउ स्वास्थ विभाग कोति ले हर स्तर म बड़का तइयारी चलत हाबे। मिले आरो के मुताबिक गरांजी म बने कोविड केयर सेंटर म बने बेवस्था करे गे हावय, मरीज मनके निगरानी खातिर कंट्रोल रूम, 32 कैमरा, मरीज मन खातिर माईक के अलावा पेयजल, शौचालय, बिस्तर के जोखा करे गे हावय। इही बेवस्था के निरीक्षण करे के खातिर जिला कलेक्टर नारायणपुर श्री अभिजीत सिंह पहुंचिन संग म एसडीएम दिनेश कुमार नाग, डिप्टी कलेक्टर वैभव क्षेत्रज्ञ, सुश्री निधी साहू, सिविल सर्जन डॉ एम.के सूर्यवंशी के अलावा आन अधिकारी मन तको उपस्थित रिहिन।
ये मउका म सिविल सर्जन डॉ सूर्यवंशी ह कलेक्टर ल बताइन के जिला चिकित्सालय के एएनएम ट्रेनिंग सेंटर म कोविड केयर सेंटर संचालित हाबे तिहा 100 बिस्तर के व्यवस्था हावय। जेमा कोविड के ईलाज खातिर 80 मरीज भर्ती हाबे। जानबा होवय के बालक बुनियादी आवासीय स्कूल गरांजी म कोरोना वायरस कोविड-19 के ईलाज खातिर सुविधायुक्त कोविड 19 केयर सेन्टर बनाये गे हावय जिहा 82 कमरा म 650 बिस्तर के बेवस्था करे गे हावय संग म लांड्री, जनरेटर, मेडिकल स्टाफ खातिर ड्रोनिंग अउ डोफिंग एरिया तको बनाये गे हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।