सरकारी इंग्लिश मीडियम स्कूल म तको सुरू होगे ऑनलाइन कक्षा, कुम्हारी स्कूल के निरीक्षण म पहुंचिस कलेक्टर

दुर्ग.05। छत्तीसगढ़ सरकार के नवा अंग्रेजी माध्यम के स्कूल म एसो ले पढ़ाई तको सुरू होगे, कोरोना के सेती ऑनलाइन कक्षा लेवत हावय गुरूजी मन। जिला कलेक्टर डॉ. सर्वेश्वर नरेन्द्र भुरे ह आज कुम्हारी के शासकीय अंग्रेजी माध्यम स्कूल के निरीक्षण करिन। ये मउका म ओमन स्कूल प्रबंधन ले इंग्लिश मीडियम म होवइया पढ़ाई, पुस्तकालय सहित आन सुविधा, निजी स्कू्ल ले बने राखे के निर्देश दिस। लाइब्रेरी बेहतरीन होवय, बने-बने किताब के संग्रह राहय।

ओमन आगू किहिन के स्कूल प्रबंधन ल आदर्श शाला के मुताबिक सबले अच्छा कार्य करे के कोशिश करना होही, विद्यालय आदर्श विद्यालय होना चाहि। जानबा होवय के मुख्यमंत्री श्री भूपेश बघेल के निर्देश म कुछ सरकारी स्कूल म अंग्रेजी माध्यम विद्यालय चलत हावय जिहा प्रमुख सचिव डॉ. आलोक शुक्ला ह तको कई इंग्लिश मीडियम स्कूल के निरीक्षण करिन हावय।