अंजोर.जांजगीर-चांपा,20। प्रदेशभर म नियमितीकरण के मांग ल लेके संविदा स्वास्थ्य कर्मी मन हड़ताल म बइठे हावय। आए विपदा म अउ रार मचावत काल, ऊपर ले ये हड़ताल अऊ जीव के जंजाल हो सकत हाबे। संविदा स्वास्थ्य कर्मी मन अपन मांग म अड़े हाबे अउ प्रशासन के मंशा हावय के ओमन काम म लहुंट जाए। समाचार एजेंसी के मुताबिक ये संबंध म मुख्य चिकित्सा अउ स्वास्थ्य अधिकारी डॉ बंजारे कोति ले जांजगीर-चांपा जिला म राष्ट्रीय स्वास्थ्य मिशन के अंतर्गत कार्यरत हड़ताली संविदा कर्मचारी मनला 21 सितंबर के बिहनिया 11 बजे तक अपन कर्तव्य म उपस्थित होए के नोटिस जारी करे गे हावय।
जारी नोटिस म कहे गे हाबे के वर्तमान म कोविड-,19 के संक्रमण के प्रसार के रोकथाम खातिर राज्य अउ जिला स्तर म सक्रिय कार्रवाई करे जावत हाबे। अइसन बखत म आपके 19 सितंबर ले अनिश्चितकालीन हड़ताल म जाना सर्वथा अनुचित हावय। 21 सितंबर के ड्यूटी म उपस्थित नइ होए म ओकर विरुद्ध आपदा प्रबंधन अधिनियम 2005 के धारा 51 अउ 56, छत्तीसगढ़ अत्यावश्यक सेवा संधारण, विछिन्नता निवारण अधिनियम 1979 (क्रमांक-10 1979) एस्मा के कंडिका 7 (1), छत्तीसगढ़ एपिडेमिक डिजिस कोविड-19 रेगुलेशन 2020 के कंडिका -14 के तहत् अनुशासनात्मक अउ दंडात्मक कार्रवाई करे जाही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।