मवेशी ल सड़क म ढिल्ला छोड़इया पशु मालिक उपर अब पशु क्रूरता अधिनियम के अंतर्गत होही एफआईआर

अंजोर.अम्बिकापुर-20। जिला कलेक्टर संजीव कुमार झा ह नगर के सड़क म आवारा घूमत पशु के दुर्घटना ल गंभीरता ले देखत नगर निगम आयुक्त ल आवारा घूमत पशु मनला कांजी हाउस म रखे के संग उंकर मालिक मन उपर पशु क्रूरता अधिनियम के अंतर्गत एफआईआर दर्ज के निर्देश दे हाबे। 

जानबा होवय के अम्बिकापुर नगर चारो मुड़ा ले रिंग रोड म घेराये हाबे, मुख्य मार्ग तको हाबे। जेमा सबो प्रकार के वाहन के आवागमन होते रिथे। अइसन म मवेशी के सड़क म घूमे या बइठे ले दुर्घटना होना स्वाभाविक हाबे। दुर्घटना म जन क्षति के संग बेजुबान मवेशी मनके तको मउत हो जथे या शारीरिक कष्ट ले जूझे ल परथे। नगर निगम ह आवारा पशु ल कांजी हाउस म रखके जुर्माना लगाये अउ नीलामी करे के कार्यवाही करथे तभो ले पशु मालिक मन पशु ल बांधके राखत नइये।