अंजोर.रायगढ़,23। आन बर भले बिपत के बेरा होही फेर जुवडि़हा मन बर तो सबोच दिन बरोबर, एक कोति कोरोना के रोना अउ दूसर कोति ले IPL सीजन 13 म लाखो रूपिया के सट्टा चलत हाबे। ये मामला म रायगढ़ पुलिस ल बड़का कामयबी मिले हाबे समाचार एजेंसी के मुताबिक पुलिस अधीक्षक रायगढ़ संतोष कुमार सिंह के निर्देश म सबो थाना, चौकी प्रभारी मन क्रिकेट सट्टा म नजर रखे रिहिसे। तभे सायबर सेल ल रायगढ़ के एक खाईवाल अपन गैंग के साथ घरघोड़ा म रिस्तेदार के घर ले IPL क्रिकेट म सट्टा के आरो मिलिस। सटोरिया मन हाईटेक तरीका ले मोबाइल म सट्टा लगाके पैमेंट तको ऑनलाइन करय। आरो के मुताबिक रायगढ़ कोतरारोड़ के खाईवाल रौनक उर्फ गोलू अग्रवाल अउ गांजा चौक रायगढ़ के विकास अग्रवाल उर्फ पुन्नु के पीछे लगे रिहिस पुलिस। मुखबिर ले दूनो के मोहम्मद सब्बीर, चांदनी चौक के साथ लगातार घरघोड़ा आये-जाये के पूरा थाना प्रभारी घरघोड़ा निरीक्षक कृष्णकांत सिंह ल दिस। थाना प्रभारी घरघोड़ा ह रात के दबीस देके मउका म मोबाईल, कम्प्युटर, लेपटाप ले IPL क्रिकेट म सट्टा खिलावत मिलिस।
पुलिस रेड कार्यवाही म कोनो कमरा ले नइ भागे सकिस, अउ पुलिस ह रवि अग्रवाल पिता हरि अग्रवाल, समीर खान पिता स्व. एम एस खान, मोहम्म द सब्बीर पिता स्व. एम एस खान, रौनक उर्फ गोलू अग्रवाल पिता राजेश अग्रवाल, विकास अग्रवाल उर्फ पुन्नु पिता राम लाल अग्रवाल, कमल रोहिला पिता सुभाष रोहिला ह पकडि़स। ओकर मनले नगदी 7240 रूपये, 14 मोबाईल, एक DELL कंपनी के लेपटाप कम्प्युटर, पेन, एक रजिस्टर जेमा 8 लाख रूपिया के सट्टा-पट्टी के हिसाब लिखे जप्त करे गिस।
सबो आरोपी मनके विरूद्ध थाना घरघोड़ा म धारा 4 (क) जुआ एक्ट के साथ प्रतिबंधात्मक कार्यवाही धारा 151 जा.फौ. के तहत करे गिस। येकर पहिली तको पूंजीपथरा पुलिस ह आईपीएल सट्टा म कार्यवाही करे रिहिस। पुलिस अधीक्षक के मुताबिक सट्ट ले जुड़े लिंक के जानकारी एकत्र करे बर सायबर सेल लगे हाबे, आईपीएल क्रिकेट सट्टा के नेटवर्क ले जुड़े लोगन मन निगरानी म हावय, आरो मिलते ही तुरते ठिकाना म छापामार कार्यवाही करे जाही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।