बीजापुर के गांव कोमला के नोनी अंजली कुडि़यम ल सोनू सूद किहिस ‘आंसू पोंछ ले बहिनी, किताब भी नवा होही, घर भी नवा होही...’

बीजापुर.20। छत्तीसगढ़ के वनांचल जिला बीजापुर के गांव कोमला म आए बाढ़ ले अपन टूटे घर म रखे, पानी म फिले किताब ल देखके रोवत नोनी अंजली कुडि़यम के वीडियो ल सोशल मीडिया म पत्रकार मुकेश चंद्राकर जी ह शेयर करिन। वीडियो म जानकारी दिस के ‘15-16 अगस्त के दरम्यानी रात म आये बाढ़ म अंजली के घर लगभग जमींदोज होगे। घर ल देखके तो नहीं मगर बांस के बने टोकनी म रखाये अपन फिले पुस्तक ल देखके आदिवासी नोनी के आंखी म आंसू आगे। कोनो आदिवासी लइका म अइसन पुस्तक बर मया पहिली बार देखेव।’ 

18 अगस्त के ये पोस्ट ल बॉलीवुड के बड़का फिल्म स्टार अउ कोरोना काल म गरीब मजदूर मनके मसीहा के रूप म आगू आए सोनू सूद 19 अगस्त के रिट्वीट करके लिखिस के ‘आंसू पोंछ ले बहिनी, किताब भी नवा होही, घर भी नवा होही....’।

छत्तीसगढ़ के आदिवासी नोनी अंजली बर सोनू सूद के मदद के दू आखर ह अतेक असरदार होइस के प्रदेश सरकार के आला अधिकारी हब ले बीजापुर के गांव कोमला पहुंच के आर्थिक मदद कर दीस। मिले आरो के मुताबिक कोमला निवासी अंजली कुड़ियम ल बाढ़ ले टूटे घर ल फेर ले बनवाये खातिर एक लाख एक हजार 9 सौ रूपिया के सहायता राशि के चेक प्रदान करिस। येकर अलावा जिला प्रशासन डहर ले अंजली ल पीएटी के तइयारी खातिर किताब तको देही। 

सोशल मीडिया म खबर चले ले ये नोनी ल तो मदद मिलगे फेर ओमन के का होही जेकर कोनो आरो लेवइया नइये, भगवान जाने। अब तो सोशल मीडिया म वीडियों वायरल होए के बाद मदद के अबड़ अकन हाथ आगू आए हाबे। जोहार पत्रकार साथी मनला जेन मन गरीब आदिवासी मनके आवाज बनके सरकार तक पहुंचत हाबे।

आंसू पोंछ ले बहन...
किताबें भी नयीं होंगी..
घर भी नया होगा। https://t.co/crLh48yCLr

— sonu sood (@SonuSood) August 19, 2020