राज के मुखिया बनाम गांव के मुखिया.... पोरा तीजा आज मनही मुख्यमंत्री निवास म, गांव-गांव म तीजा नी लाने-लेगे के परगे हाबे हांका

अंजोर
0

रायपुर.18। छत्तीसगढ़ ल तीज-तिहार के गढ़ कहे जाथे, इहां हरेली ले होली तक नंगत अंकन तिहार लमियाथे। फेर ग्राम्य अउ कृषि संस्कृति के उच्छाह मंगल के परब मन एसो कोरोना राई के सेती निच्चट पंछुहा होगे हाबे। न मरे सकस न मोटाये सकस सहि, बस जिनगी कइसनो करके चलत हाबे। ये बीच मुख्यमंत्री निवास म सबो परब के जबर उत्साह देखे जावत हाबे। आज पोरो तिहार आए ये सेती महिला अउ बाल विकास विभाग डहर ले पोरा-तीजा तिहार के आयोजन खातिर विशेष इंतजाम करे गे हावय। जानकारी के मुताबिक सीएम हाउस म नंदिया बइला के पूजा के बाद तीजा महोत्सव के आयोजन होही। पोरा-तीजा तिहार खातिर कार्यक्रम म बहिनी मनला नेवता पठोय गे हावय। 

मुख्यमंत्री निवास म आयोजित कार्यक्रम म एक सेल्फी जोन तको बनाये गे हावय। जिहां नंदिया बइला संग लोगन सेल्फी लेही। कार्यक्रम म पोरा चुकिया, शिवलिंग के पूजा करे जाही। रइचुली झूला अउ चकरी झूला तको कार्यक्रम स्थल म लगाये गे हावय। अऊ कोविड -19 के प्रकोप ल देख हुए आयोजन ल सीमित संख्या म लोगन आमंत्रित करे गे हावय। कार्यक्रम म शामिल होवइया मन मास्क लगाके आही अउ फिजिकल डिस्टेंसिंग के पालन करही।

पोरा के बाद तीजा के तिहार अवइया हाबे बहिनी-बेटी मन मइके जाए खातिर ददा-भाई मनके आगोरा करत हाबे। फेर एसो तो तीजा नी जा सकही तइसे लागथे। गांव-गांव म हांका करत हाबे के तीजा लेगना-लानना मना हाबे अउ जेन तीजा लेगही-लानही तेना डाड़़ परही। बताये के मुताबिक अइसन शासन-प्रशासन डहर ल कोनो आदेश जारी नइ होए हाबे, पंचायत हाबे मन खुदे अपन-अपन स्तर म हांका पारे हाबे कोरोना राई के सेती। पंयाचत प्रतिनिधी मनके साव-चेत के जय जय हो, फेर तीजा-पोरा कइसे मनही येकरो कोनो रद्दा निकालव, जइसे सीएम हाउस म होवत हाबे।

एक टिप्पणी भेजें

0टिप्पणियाँ

सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।

एक टिप्पणी भेजें (0)

#buttons=(Accept !) #days=(20)

Our website uses cookies to enhance your experience. Check Now
Accept !