छत्तीसगढ़ के राजकीय पशु बनभइसी ह उदंती-सीतानदी टायगर रिजर्व म दिस पिला, एक के पड़वा अउ दूसर के पडि़या

गरियाबंद.19। छत्तीसगढ़ के उदंती-सीतानदी टायगर रिजर्व म 18 अगस्त के दिन यादगार होगे काबर के ये दिन संघरा दू ठी बनभइसी ह पिला दे हावय। मिले आरो के मुताबिक एक ठी ह पड़वा अउ दूसर हा पडि़या पिला दे हावय। 

अपर मुख्य प्रधान वनसंरक्षक (वन्यप्राणी) अरूण पाण्डेय के बताये मुताबिक जच्चा-बच्चा दूनो बने हाबे। इहंर डाक्टरी जांच करके जरूरी दवाई अउ खाना-पानी दे जावत हावय। जानबा होवय के छत्तीसगढ़ राज्य के राजकीय पशु (बनभइसा) वनभैंसा दुर्लभ अउ संकटग्रस्त वन्यजीव म शामिल हावय। अइसन म येमन ल बने जतने के जरूरत हावय, उंकर संरक्षण अउ संवर्धन के हरसंभव प्रयास करे जावत हाबे। उदंती-सीतानदी टायगर रिजर्व म वर्तमान म 10 वनभैंसा हरवय, जेमा 9 नर वनभैंसा अउ एक मादा वनभैंसा हावय।