छत्तीसगढ़ म 31 अगस्त तक लॉकडाउन के खबर गलत, भारत सरकार अनलॉक 3 के जारी करिस दिशा निर्देश

रायपुर.03। कोरोना राई ल लेके सोशल मीडिया म तको कतकोन गलत खबर बगराये जात हावय। जेमा भरोसा करे के पहिली बने ठोस जानकार मनले आरो ले लेवय। अभी के बखत छत्तीसगढ़ के कुछ जिला, जिहां जादा कोरोना महामारी सचरे हावय उहां कलेक्टर के आदेश म लॉकडाउन करे गे हावय। रायपुर ये लॉकडाउन ल 6 अगस्ता तक बढ़ाये के गे हावय। इही संबंध म लोगन ल सोशल मीडिया के माध्यम ले गलत खबर वायरल होवत रिहिसे के 31 अगस्ते तक लॉ‍कडाउन होही। ये खबर के खंडन करत राज्य शासन के सामान्य प्रशासन विभाग ह बताये हाबे के छत्तीसगढ़ म कोरोना वायरस संक्रमण के रोकथाम अउ बचाव खातिर वर्तमान म कलेक्टर ल जिला के स्थानीय परिस्थिति ल देखत लॉकडाउन के अधिकार दिये गे हाबे। जेन 6 अगस्त तक ही प्रभावित इलाका म प्रभावशील करे गे हावय। सामान्य प्रशासन विभाग डहर ले 30 जुलाई के पत्र जारी करके सबो जिला कलेक्टर मनला भारत सरकार के अनलॉक-3 के दिशा निर्देश प्रेषित होगे।