घुरूवा के संग अब तो गोबर के दिन तको बहुरत हाबे, समूह के दीदी मन बनाथे आनी-बानी के जिनिस

बेमेतरा.03। छत्तीसगढ़ के मुखिया श्री भूपेश बघेल के नवाचार योजना मन ह सिरतोन म गांव के अर्थव्यवस्था ल मजबूत करत हाबे। इंसान के काबिलियत उंकर मेहनत ऊपर निर्भर करथे, कोनो ह यदि कम मेहनत अउ कम संसाधन म ज्यादा फायदा मिलय तो एक अलग ही चिनहारी मिलथे। अइसने चिनहारी पाथे टिपनी के जय महामाया महिला स्व सहायता समूह के महिला मन गोबर ले गमला बनाके। 

मुख्यमंत्री श्री भूपेश बघेल के दूरदर्शिता ले अब गोबर के उपयोग व्यवसायिक रूप म होवत हाबे। अब गोबर ले छेना नहीं बल्कि दीया, गमला अउ आन जिनिस तको बनत हाबे। गोबर के बने गमला ले अब बेमेतरा जिला के ग्राम पंचायत टिपनी के जय महामाया महिला स्व सहायता समूह ने कमाई तको शुरू होगे। महिला मन अभी तक 1200 गमला बेचके 18 हजार रूपिया के कमाई करे हाबे। एक गमला बनाये म 7 रूपिया के लागत आथे अऊ बेचाथे 15 रूपिया। महिला मन अभी तक 1500 गमला बना डरे हाबे। 

गोबर के गमला बनाये म कच्चा माल के रूप म गोबर, पीली मिट्टी, चूना, भूसा आदि के उपयोग होथे। गोबर के गमला ह टिकाऊ तो होबे करथे अउ प्लास्टिक-पॉलीथिन ले तो बनेच आए। कहू फूटगे तव खातू के तको काम आ जथे। येकर ले एक फायदा अऊ होथे के गोबर के गमला म लगे पौधा ल भुइंया म लगाना हाबे तव गमला ल फोरे के जरूरत नइ परय।