माटीकला के बर्तन अब ऑनलाईन वेबसाईट जइसे अमेजॉन अउ फ्लिपकार्ट म तको मिलही

सूरजपुर.29। छत्तीसगढ़ माटीकला बोर्ड के माटी के बर्तन अब ऑनलाईन वेबसाईट जइसे अमेजॉन अउ फ्लिपकार्ट म तको मिलही। राज्य शासन के मंशा के अनुरूप सूरजपुर जिला के ग्राम तेलईकछार म ग्लेजिंग यूनिट के स्थापना करे गे हावय। जिहां कुम्हार समाज के लोगन ल स्व-रोजगार ले जोरे अउ स्वावलंबी बनाये के उदीम करे गे हावय। साथ ही पॉलीथीन मुक्त जिला के परिकल्पना ल लेके माटी ले बने बर्तन के उपयोग करके स्वच्छ सूरजपुर ‘हमर माटी-हमर सुघ्घर सूरजपुर’ खातिर हर संभव प्रयास करे जाही।  

सूरजपुर जिला कलेक्टर ह तेलईकछार स्थित माटीकला केन्द्र के निरीक्षण करत कारीगर मनला प्रोत्साहित करके उंकर बुता ल सहराइस। जानबा होवय के तेलईकछार म राज्य के दूसरा ग्लेजिंग यूनिट के स्थापना करके माटी के बर्तन तैयार करे जावत हाबे। जेमा थाली, गिलास, कटोरी, चम्मच, पानी बोतल, कुल्हड़, चाय-केटली संग आन घरेलू बर्तन बनाये जाथे। येकर ले पर्यावरण संरक्षण के साथे स्थानीय लोगन ल स्व-रोजगार मिलथे। ओमन ह माटीकला केन्द्र के उत्पाद के होर्डिंग अउ बैनर के माध्यम ले व्यापक प्रचार-प्रसार करे बर किहिन जेकर ले लोगन आकर्षित होके जादा ले जादा जिनिस ल बिसाही।