रायपुर.01। छत्तीसगढ़ म कोरोना काल म तको मनरेगा (महात्मा गांधी राष्ट्रीय ग्रामीण रोजगार गारंटी योजना) बुता म उत्कृष्ट प्रदर्शन करे हाबे। चालू वित्तीय वर्ष 2020-21 म मनरेगा जॉबकॉर्डधारी परिवार ल 100 दिन के रोजगार दे म छत्तीसगढ़ देश म पहिली नंबर म हाबे। अप्रैल, मई अउ जून म कुल 55 हजार 981 परिवार ल 100 दिन के रोजगार उपलब्ध कराये गे हाबे। देश म 100 दिन के रोजगार हासिल करइया कुल परिवार म अकेल्ला छत्तीसगढ़ के हिस्सेदारी करीब 41 प्रतिशत हावय।
चालू वित्तीय वर्ष म लक्ष्य के विरूद्ध रोजगार सृजन के मामला म छत्तीसगढ़ देश म दूसरइया हाबे। शुरूआती तीन महीन म ही इहां सालभर के लक्ष्य के 66 प्रतिशत काम पूरा कर लिये गे हाबे। ये बखत आठ करोड़ 84 लाख 50 हजार मानव दिवस रोजगार के सृजन करे गे हाबे। ग्रामीण मनला रोजगार दे म नक्सल प्रभावित जिला मन तको बने काम करे हाबे। प्रदेश म लक्ष्य के विरूद्ध सर्वाधिक रोजगार देवइया पहिली पांच जिला बस्तर संभाग के हावय। प्रदेश के दस जिला ह ये साल खातिर स्वीकृत लेबर बजट के 70 प्रतिशत ले आगर के बुता ल कर डारे हाबे।
मुख्यमंत्री श्री भूपेश बघेल अउ पंचायत, ग्रामीण विकास मंत्री श्री टी.एस. सिंहदेव ह मनरेगा म सरलग बने बुता खातिर विभाग के अधिकारी, कर्मचारी अउ पंचायत प्रतिनिधी मनला बधाई दे हाबे। ओमन किहिन के कोविड-19 के चलत लाक-डाउन के बावजूद मनरेगा के अंतर्गत लघियात सुरू होए काम ले गांव के लोगन मनला सीधा रोजगार मिले हाबे। मनरेगा बुता ह विपरीत परिस्थिति म गांव वाले मनके अर्थव्यवस्था ल गतिशील राखे म महत्वपूर्ण भूमिका निभाये हाबे। ओमन उम्मीद जताये हाबे के पंचायत प्रतिनिधी मनके जागरूकता अउ मनरेगा टीम के सक्रियता ले प्रदेश म आगू तको मनरेगा के तहत बनेच बुता होही।
भारत सरकार ह चालू वित्तीय वर्ष म छत्तीसगढ़ खातिर कुल 13 करोड़ 50 लाख मानव दिवस के लेबर बजट स्वीकृत करे हाबे। साल के पहिली तीन महीना म ही प्रदेश ह आठ करोड़ 84 लाख 50 हजार मानव दिवस रोजगार के सृजन करके 66 प्रतिशत लक्ष्य हासिल कर ले हावे। पहली तिमाही म रोजगार सृजन के राष्ट्रीय औसत 39 प्रतिशत हावे। प्रदेश म लक्ष्य के विरूद्ध रोजगार दे म नारायणपुर जिला सबले आगू आगे हावे। उहां 84 प्रतिशत लक्ष्य पूरा कर ले गे हाबे। प्रदेश के नौ आन जिला ह 70 प्रतिशत ले आगर काम पूरा कर डारे हाबे। सुकमा 78 प्रतिशत, बीजापुर 77 प्रतिशत, बस्तर 74 प्रतिशत, कोंडागांव अउ रायगढ़ 73 -73 प्रतिशत, कांकेर अउ दंतेवाड़ा 72-72 प्रतिशत, कोरबा अउ गरियाबंद 71-71 प्रतिशत ह ये साल के लक्ष्य के 70 प्रतिशत ले जादा पा ले हाबे। बाकी 18 जिला ह 60 प्रतिशत ले जादा रोजगार सृजन कर ले हाबे।
अइसने जरूरतमंद परिवार मनला मनरेगा के तहत 100 दिन के रोजगार उपलब्ध कराये म घलोक प्रदेश म अच्छा काम होए हाबे। देश म 100 दिन के रोजगार पाये वाले परिवार के कुल संख्या एक लाख 37 हजार 365 हावे। येमा ले 40.75 प्रतिशत यानि 55 हजार 981 परिवार अकेल्ला छत्तीसगढ़ के हावय। प्रदेश म कबीरधाम जिला म सर्वाधिक 6139 परिवार मनला 100 दिन के रोजगार देवाए कराये गे हावे। ये साल अब तक बिलासपुर म 4410 परिवार, राजनांदगांव म 3804, धमतरी म 3261, बलौदाबाजार-भाटापारा म 3240 अउ मुंगेली म 3037 परिवार ल 100 दिन के रोजगार उपलब्ध कराये जा चुके हावे।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।