तोंगपाल म कॉलेज भवन के शिलान्यास अउ बारू नदी के पुल के लोकार्पण करिस उद्योग मंत्री कवासी लखमा

सुकमा.23। बस्तर अंचल के लोगन मनला तको अब उच्च शिक्षा के अवसर देवत हाबे सरकार। इही कड़ी म प्रदेश के उद्योग मंत्री कवासी लखमा ह तोंगपाल म कॉलेज भवन के शिलान्यास करिन। ये मउका म सांसद दीपक बैज अउ कवासी लखमा मन किहिन के तोंगपाल म कॉलेज के भवन बने ले लइका मनला आगू के पढ़ई करे खातिर सुकमा या जगदलपुर जाए के जरूरत नी परय। आसपास के लइका मनला कॉलेज स्तर के शिक्षा अब आसानी ले मिलही। इही दिन उद्योग मंत्री कवासी लखमा अउ बस्तर सांसद दीपक बैज ह तोंगपाल अउ मारेंगा के बीच बने नवा पुलिया के लोकार्पण तको करिन। ये पुलिया के बने ले अब एक दर्जन गांव ह मुख्य मार्ग ले जुड़ गिस। अब बरसात म अवईया जवईया मनला बने सोहनियत होही, रोजगार, स्वास्थ्य सेवा जइसन सुविधा अब झपकुन मिल पाही।