क्वारंटाइन सेंटर म गर्भवती मन खातिर टीकाकरण, जरूरी दवई सहित पौष्टिक भोजन के व्यवस्था के निर्देश

जांजगीर-चांपा.06। आन राज ले आए मजदूर जेमा कतकोन मन गर्भवती हाबे अउ क्वारंटाइन सेंटर म रूके हावय अइसन मन बर अब विशेष देखाभाल अउ जांच के बेवस्था करे के निर्देश जारी करे गे हाबे। मिले आरो के मुताबिक चिकित्सा जांच, परामर्श ले लेके गर्भवती महिला के पसंद अनुसार पौष्टिक भोजन के बेवस्था करे जाही। बताये मुताबिक जांजगीर-चांपा जिला के क्वारंटाइन सेंटर मन म लगभग 479 गर्भवती महिला मनला विशेष स्वास्थ्य सुविधा महिला अउ बाल विकास विभाग के योजना के तहत पौष्टिक आहार उपलब्ध कराये जावथे। स्वास्थ्य विभाग के टीम ह टीकाकरण, हीमोग्लोबिन अउ कोरोना टेस्ट करे हाबे। येकर अलावा आयरन अउ कैल्शियम के गोली के साथ ओमन के दिनचर्या नियमित अउ आवश्यक सावधानी बरते के तको सलाह दे जावथे। कतकोन समाज सेवी संगठन अउ जनप्रतिनिधी मन गर्भवती महिला मनके अपन कोति ले मदद तको करे हाबे। जेमा लायनेस क्लब कोति ले बिस्किट, फूटे चना, केला, सेब, फल आदि के पैकेट वितरित करे गीस। अइसने अकलतरा ब्लाक के प्रवासी मनला पौष्टिक नाश्ता, भोजन उहां के सरपंच अउ सचिव के सहयोग ले उपलब्ध कराए जाथे।