मुख्यमंत्री निवास म ड्यूटी करत सुरक्षाकर्मी निकलिस कोरोना पॉजिटिव

रायपुर.19। धीरे-धीरे कोरोना वायरस अब हर खासो आम तक बगरत हाबे। छत्तीसगढ़ म अब तक कोरोना के कुल 1946 मामला आगू आए हाबे जेमा के 1202 मरीज बने होके घर चल दे हाबे अउ बांचे 735 मरीज के अस्पताल म इलाज चलत हाबे। इहां 9 मरीज के मउत तको होगे हाबे जेमन कोरोना ले संक्रमित रिहिसे। आज आरो मिले हाबे के छत्तीसगढ़ सीएम हाउस म तैनात सुरक्षाकर्मी तको कोरोना वायरस पॉजिटिव निकलिस। मिले जानकारी के मुताबिक ओकर ड्यूटी मुख्यमंत्री निवास के बाहिर पश्चिमी गेट म रिहिसे। एजेंसी के यहू कहना हाबे के सुरक्षाकर्मी के भीतर आना-जाना नइ रिहिसे अऊ न ही ओकर सीएम हाउस के अंदरूनी सुरक्षा व्यवस्था ले कोनो संबंध रिहिस, तेन पाके अंदर के निवास परिसर म संक्रमण के कमे संभावना हाबे। तभो ले एहतियात के तौर म निर्धारित प्रोटोकाल अउ स्वास्थ्य सुरक्षा मानक के पालन करे जावत हाबे। संक्रमित सुरक्षाकर्मी ल उपचार खातिर अस्पताल म भरती करा दे गे हाबे।