5700 करोड़ डीबीटी के माध्यम ले चार किश्त म जाही किसान के खाता म, पहिली किश्त म 1500 करोड़ रूपिया, प्रदेश म धान, मक्का अउ गन्ना (रबी) के 19 लाख किसान ल मिलही फायदा
भारत के पूर्व प्रधानमंत्री भारत रत्न स्वर्गीय श्री राजीव गांधी के शहादत दिवस 21 मई ले छत्तीसगढ़ सरकार ह बड़का किसान न्याय योजना सुरू करत हाबे। नई दिल्ली ले श्रीमती सोनिया गांधी अउ राहुल गांधी तको वीडियो कांफ्रेसिंग के जरिए योजना के शुभारंभ कार्यक्रम म सामिल होही। मिले आरो के मुताबिक मुख्यमंत्री श्री भूपेश बघेल के अलावा मंत्रीमंडल के सदस्य श्री टीएस सिंहदेव, ताम्रध्वज साहू, रवीन्द्र चौबे, प्रेमसाय सिंह टेकाम, मोहम्मद अकबर, कवासी लखमा, शिव कुमार डहरिया, श्रीमती अनिला भेंडि़या, जयसिंह अग्रवाल, गुरू रूद्र कुमार, उमेश पटेल अउ अमरजीत भगत मन तको मुख्यमंत्री निवास कार्यालय म आयोजित कार्यक्रम म दोपहर 12 बजे स्वर्गीय राजीव गांधी के तैल चित्र म पुष्पांजलि अर्पित करही तेकर पाछू किसान मनके खाता म पहिली किश्त के रूप म 1500 करोड़ रूपिया ऑनलाईन अंतरण करे जाही। ये कार्यक्रम म सांसद, विधायक, अन्य जनप्रतिनिधि, किसान अउ आन हितग्राही मन तको वीडियो कांफ्रेसिंग ले जुड़ही।
जानबा होवय के भूपेश सरकार ह सत्ता संभाले के बाद तुरते किसान मनके करजा माफी करिस। अब समर्थन मूल्य के अंतर के राशि 5700 करोड़ रूपिया डीबीटी के माध्यम ले चार किश्त म किसान मनके खाता म डारे के योजना हाबे। जेमा पहिली किश्त के रूप म 1500 करोड़ रूपिया 21 मई के जारी होही। ये योजना ले प्रदेश म धान, मक्का अउ गन्ना (रबी) के 19 लाख किसान ल मिलही फायदा। छत्तीसगढ़ सरकार ह किसान मन खातिर सबले बड़का योजना बनइया देश के पहिली राज्य के रूप म सामने आए हाबे। येकर ले किसान मन ल गजब प्रोत्साहन तको मिलही। एसो ले राज्य सरकार ह येमा धान, मक्का, सोयाबीन, मूंगफली, तिल, अरहर, मूंग, उड़द, कुल्थी, रामतिल, कोदो, कोटकी अउ रबी म गन्ना फसल तको सामिल करे हाबे।
भूपेश दाऊ के सरकार ह यहू बात केहे हाबे के अनुदान लेवइया किसान कहू पाछू साल धान के फसल अउ ए साल आन फसल लेही तव ओमन ल प्रति एकड़ अतिरिक्त सहायता तको दे जाही। फसल बीमा अउ प्रधानमंत्री किसान सम्मान योजना के तहत 900 करोड़ के राशि किसान मनके खाता म आगे हाबे साथ ही कृषि भूमि अर्जन म चार गुना मुआवजा, सिंचाई कर माफी जइसन योजना ले छत्तीसगढ़ के किसान अब खुसहाल होवत हाबे। रायपुर.20
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।