खरीफ के बखत के धान खरीद म कतकोन किसान मन समर्थन मूल्य म धान नइ बेच पाए रिहिसे। अइसन किसान जेन मनके टोकन कट गे रिहिसे ओमन के धान ल फेर सरकार ह खरीदे खातिर 20 ले 22 मई के दिन ल करार करे हाबे। जेमा लगभग 4 हजार 549 टोकनधारी मनले 2 लाख 803 क्विंटल धान खरीदे जाही, जेकर कीमत 36 करोड़ 64 लाख 66 हजार 442 रूपिया होही। खाद्य नागरिक आपूर्ति अउ उपभोक्ता संरक्षण विभाग कोति ले प्रबंध संचालक छत्तीसगढ़ राज्य सहकारी विपणन संघ अउ जिला कलेक्टर मनला ये संबंध म दिशा-निर्देश जारी कर दे गे हाबे। सरकार कोति ले मिले आरो के मुताबिक छत्तीसगढ़ राज्य म खरीफ विपणन वर्ष 2019-20 म समर्थन मूल्य म धान बेचे खातिर राज्य के बस्तर, बीजापुर, दंतेवाड़ा, कांकेर, कोण्डागांव, सुकमा, बिलासपुर, मुंगेली, रायगढ़, बेमेतरा, कवर्धा, रायपुर, बलरामपुर, कोरिया अउ सरगुजा जिला के 4549 टोकनधारी किसान बांचगे रिहिसे। जानबा होवय के कृषि मंत्री रविन्द्र चौबे, वन मंत्री मोहम्मद अकबर अउ खाद्य मंत्री अमरजीत भगत संग आन जनप्रतिनिधी मनके अर्जी ले मुख्यमंत्री भूपेश बघेल ह टोकन के जांच कराके धान खरीदी कराये के निर्देश दे हाबे। रायपुर.20
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।