छत्तीसगढ़ शासन ह प्रशासनिक बदलाव करत 2014 बैच के आई.ए.एस अफसर अमृत विकास तोपनो ल संचालक संस्कृति अउ पुरातत्व के नवा जिम्मेदारी दे हावय।
श्री तोपनो महाप्रबंधक, छत्तीसगढ़ राज्य नागरिक आपूर्ति निगम ह दू मई के पदभार लेलिस। ये मउका म पूर्व संचालक, संस्कृति अउ पुरातत्व श्री अनिल कुमार साहू पुष्पगुच्छ भेंट करके उंकर स्वागत करिस। जानबा होवय के शासन कोति ले श्री तोपनो ल संचालक, संस्कृति अउ पुरातत्व के अतिरिक्त प्रभार सौंपे गे हावय। अब तक श्री साहू के कार्यकाल ल देखे जाए तव बने बुता करिन, राजिम मेला ले लेके आदिवासी महोत्सव तक ल सफल बनाये हाबे। फेर कलाकार मनके जुन्ना पइसा बर उहू बने जिकर नइ करिस। पूर्व सरकार के शासन काल म गजब अकन कार्यक्रम ल कलाकार मन विधायक अउ मंत्री मनके केहे म करिन, विभाग ल जानकारी तको नइ रिहिस। यहू ल पइसा अटके के एक कारण माने जावत हाबे। अब नवा अफसर ले बने बुता के आस हाबे फेर उहू तो अतिरिक्त प्रभार म आए हाबे। संस्कृति अउ पुरातत्व विभाग ह छत्तीसगढ़ के महत्वपूर्ण विभाग आए। पाछू के कुछ बछर अऊ अब के एक बछर के नवा सरकार के कार्यकाल ल देखे जाए तव छत्तीसगढ़ के मूल संस्कृति बर बने काम होइसे। अइसन म संचालक के पद म छत्तीसगढ़ी कला-संस्कृति-साहित्य के जानकार अउ सम्मान करइया स्वतंत्र प्रभार के अफसर आए त बने होही। रायपुर. 03
