गुजरात राज म फंसे मजदूर मनला धरके पहिली रेलगाड़ी बिलासपुर स्टेशन म बिहनिया 10 बजे पहुंचही। मिले आरो मुताबिक जिला प्रशासन ह सबो तइयारी कर डरे हाबे। ये रेलगाड़ी ह एक हजार 208 आदमी धरे अहमदाबाद, गोधरा, रतलाम, बीना, कटनी, पेन्ड्रारोड होवत बिलासपुर पहुंचही। जानबा होवय के ये रेल म मुंगेली जिला के 20, जांजगीर-चाम्पा जिला के 53 अउ दुर्ग जिला के 11 झिन मजदूर तको शामिल हाबे। सावधानी ल धियान म राखत जिला प्रशासन डहर ले रेल के डब्बा ले एक-एक पइत करके यात्री मनला उतारे जाही अउ हैंड सेनेटाइजर, मास्क दिए जाही। रेलवे स्टेशन के सबो गेट म स्वास्थ्य विभाग के टीम उंकर जांच करत जाही। आने-आने जिला के लोगन मन ला आने-आने गेट ले बाहिर निकाले अउ 60 बस म बइठार के रवाना करे के आरो मिले हाबे। बिलासपुर.11
