रायपुर। कोरोना राई के सेती पाछू 2 महीना ले बंद देश के हवाई सेवा ल अब नवा गाइडलाइंस के साथ घरेलु उड़ान बर अनुमति मिलगे हाबे। स्वामी विवेकानंद एयरपोर्ट रायपुर म पूरा टर्मिनल भवन ल सेंट्रल वेयरहाउसिंग कार्पोरेशन कोति ले कीटाणुरहित करे गिस। येकर अलावा बुखार जांच, साफ-सफाई, सैनिटाइज़र अउ सोशल डिस्टेंसिंग जइसन सुरक्षा उपाय संग यात्री मनके सुवागत बर तइयार हाबे स्वामी विवेकानंद एयरपोर्ट। ये बात के जानकारी देवत स्वामी विवेकानंद एयरपोर्ट ह ट्वीट करके फोटो अउ वीडियो साझा करे हाबे।
सुरक्षा के जायजा ले खातिर रायपुर पुलिस तको स्वामी विवेकानंद एयरपोर्ट पहुंचिन। ये मउका म रायपुर एसएसपी आरिफ शेख ह एयरपोर्ट सोशल डिस्टेंसिंग अउ उड़ान संबंधी गाइडलाइंस के कड़ाई ले पालन करवाये के निर्देश दीस। जानबा होवय के कोविड-19 के संक्रमण ल देखत के यात्री मनके सुरक्षा खातिर पुलिस संग एयरपोर्ट अउ मेडिकल टीम सरलग सेवा देही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।