19 प्रकार के अत्याधुनिक चिकित्सा सेवा
अंजोर.रायपुर। तइहा समे म डीके के नाव ले राज भर के लोगन के इलाज करइया अस्पताल ह मंत्रालय बने के बाद नंदागे रिहिस। अब फेर डीके अस्पताल सुपर स्पेशिलिटी सुविधा के संग सुरू होवथाबे।जानकारी के मुताबिक इहां बड़का बीमारी वाले मरीज मनके इलाज होही। उहां चिकित्सा शिक्षा ले जुरे स्नातकोत्तर पाठ्यक्रम तको सुरू करे जाही। ये बात के फइसला केबिनेट के बइठका म करे गिस। स्वास्थ्य मंत्री अजय चंद्राकर के मुताबिक डी.के. भवन म प्रस्तावित अत्याधुनिक अस्पताल म चिकित्सा सेवा ले जुरे 19 विभाग के सुविधा होही। जेमा हृदय रोगी खातिर कार्डियोलॉजी विभाग, किडनी के मरीज खातिर नेफ्रोलॉजी विभाग तको रिही येकर अलावा न्यूरोलॉजी, न्यूरोसर्जरी, बर्नप्लास्टी, पीडियाट्रिक सर्जरी, रेडियो-डायग्नोसिस, पैथोलॉजी, निश्चेतना, बायोकेमेस्ट्री, माइक्रोबायोलॉजी, एण्डो-क्रायोनोलॉजी, रेहिमेटोलॉजी, मेडिकल ग्रेस्टोइन्ट्रालॉजी, पीईटी स्केन, हिमेटोलॉजी, यूरोसर्जरी, सर्जिकल ग्रेस्ट्रोएंट्रोलॉजी, कार्डियो थोरेसिक सर्जरी के विभाग तको सुपर स्पेशिलिटी अस्पताल म होही।मंत्रिपरिषद के बइठका म सुपर स्पेशिलिटी अस्पताल के स्थापना अउ स्नातकोत्तर पाठ्यक्रम के संचालन खातिर दू विकल्प उपर विचार करे गिस। जेमा पहिली सार्वजनिक-निजी भागीदारी (पीपीपी) मॉडल। अउ दूसरा विभागीय रूप ले संचालित करना। ये विसय म फइसला करे खातिर स्वास्थ्य विभाग ल अधिकृत करे गे हावय।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।