शिक्षक भर्ती बर मचिस रार: बेरोजगार मन ल पुलिस लेगे जेल, बगरिस भारी तनाव

​रायपुर: छत्तीसगढ़ म शिक्षक भर्ती के मांग ल लेके सियासत अऊ आंदोलन के आगी तेज होगे हावे। राजधानी रायपुर म हजारों के संख्या म डी.एड (D.Ed) पास बेरोजगार लइका मन शिक्षा मंत्री के बंगला घेरे बर निकलिन। लइका मन के कहना हे कि सरकार ह चुनाव के पहिली 'मोदी के गारंटी' के तहत बड़े-बड़े वादा करे रिहिस, पर आज नौकरी मांगे बर जाय म ओ मन ल पुलिस के डंडा अऊ जेल मिलत हे।

​जइसने बेरोजगार मन के भीड़ मंत्री के बंगला डहर बढ़िस, पुलिस ह ओ मन ल रोंक लिस। लइका मन अऊ पुलिस के बीच भारी झूमाझपटी होईस। एखर बाद पुलिस ह जबरदस्ती बेरोजगार मन ल बस मा भर-भर के जेल भेज दिस। आंदोलनकारी मन के कहना हे कि "विष्णु देव के सुशासन" म युवा मन के आवाज ल दबाए जावत हे। जेकर हाथ म नियुक्ति पत्र होना रिहिस, आज ओ मन ल अपराधी कस जेल मा ठूंसे जावत हे।

​बेरोजगार मन ह सरकार ल चेतावत कहिन कि जब तक शिक्षक भर्ती के विज्ञापन जारी नहीं होही, तब तक ये लड़ई जारी रही। छत्तीसगढ़ के युवा मन म ए बात ल लेके भारी गुस्सा हे कि सत्ता म आए के बाद सरकार अपन वादा ल भुला गे हे। अब देखना ये हे कि सरकार ए बेरोजगार मन के गुहार ल सुनथे या पुलिस के दम मा ए आंदोलन ल शांत करथे।