मुख्यमंत्री विष्णु देव साय ह कहिन कि चित्रोत्पला फिल्म सिटी अउ ट्राइबल कन्वेंशन सेंटर सिर्फ ईंटा-पथर के ढांचा नोहे, बल्कि ये हमर राज्य के सांस्कृतिक, आर्थिक अउ रचनात्मक भविष्य के एक सशक्त नेव आय। छत्तीसगढ़ ह प्राकृतिक सुघराई अउ सांस्कृतिक विविधता ले भरे हुए हे। ए पहल ले पर्यटन के संग-संग फिल्म उद्योग ला घलो एक नवा दिशा मिलही। पिछले कुछ बछर मन में छत्तीसगढ़ ह फिल्म निर्माता मन बर एक पसंदीदा जगह बन के उभरे हे। हमर सरकार के सफ्फा योजना हे कि आने वाला दू बछर के भीतर ए परियोजना मन ला पूरा करके राज्य ला समर्पित कर दे जाही।
ए मऊका में वन मंत्री केदार कश्यप, सांसद बृजमोहन अग्रवाल, विधायक अनुज शर्मा, विधायक इंद्र कुमार साहू, छत्तीसगढ़ फिल्म विकास निगम के अध्यक्ष सुश्री मोना सेन, छत्तीसगढ़ पर्यटन बोर्ड के अध्यक्ष नीलू शर्मा, जिला पंचायत अध्यक्ष नवीन अग्रवाल अउ पर्यटन विभाग के सचिव डॉ. रोहित यादव मौजूद रहिन।
मास्टर प्लान के अवलोकन अउ लघु फिल्म
भूमिपूजन के बखत मुख्यमंत्री ह फिल्म सिटी के प्रस्तावित मास्टर प्लान ला बड़े ध्यान ले देखिन। ओमन अधिकारी मन ले निर्माण ले जुड़े जरूरी जानकारी लिन अउ ए परियोजना पर आधारित एक ठन लघु फिल्म (Short Film) घलो देखिन, जेमा बताए गे रिहिस कि बने के बाद ये फिल्म सिटी कइसन दिखही।
फिल्म निर्माण बर मिले 4 बड़े प्रस्ताव
फिल्म सिटी के काम सुरू होय के संग ही पर्यटन विभाग ला फिल्म बनाए अउ कन्वेंशन सेंटर में इकाई खोले बर चार ठन बड़े प्रस्ताव मिले हें, जेला मुख्यमंत्री ला सौंपे गिस:
- अनिल शर्मा (गदर फिल्म के निर्माता): ओमन अपन आने वाला फिल्म के शूटिंग चित्रोत्पला फिल्म सिटी में करे के प्रस्ताव रखिन।
- राकेश कुमार (इंडिया एक्सपोजीशन मार्ट): ओमन ट्राइबल सेंटर में इंटरनेशनल एक्जीबिशन सेंटर अउ ट्रेड मार्ट बनाए के बात कहिन।
- नीरज खन्ना (एक्सपोर्ट प्रमोशन काउंसिल): इहाँ वर्ल्ड क्लास हैंडीक्राफ्ट्स अउ गिफ्ट फेयर (हस्तशिल्प मेला) आयोजित करे के प्रस्ताव दीन।
- आशुतोष वाजपेयी (एटी फिल्म्स हॉलीवुड): ओमन हॉलीवुड फिल्म अउ ओटीटी कंटेंट ला छत्तीसगढ़ लाए के प्रस्ताव मुख्यमंत्री ला सौंपिन।
बजट अउ पीपीपी मॉडल
ए परियोजना मन ला भारत सरकार के पर्यटन मंत्रालय कोति ले "कैपिटल इन्वेस्टमेंट हेतु राज्यों को विशेष सहायता" योजना के तहत मंजूरी मिले हे।
- चित्रोत्पला फिल्म सिटी बर 95.79 करोड़ रुपये।
- ट्राइबल एंड कल्चरल कन्वेंशन सेंटर बर 52.03 करोड़ रुपये। ये काम पीपीपी (Public-Private Partnership) मॉडल में होही। एखर अलावा निजी क्षेत्र कोति ले लगभग 300 करोड़ रुपये के निवेश होय के घलो संभावना हे।
100 एकड़ में का-का सुविधा मिलही?
ये फिल्म सिटी अउ कन्वेंशन सेंटर लगभग 100 एकड़ इलाका में विकसित करे जाही।
- शूटिंग बर सेट: गाँव, सहर, गली-खोर, एयरपोर्ट, रेलवे स्टेशन, जेल, पुलिस चौकी, स्कूल-कॉलेज, अउ मंदिर मन के स्थायी सेट बनही।
- पर्यटक मन बर: टॉय म्यूजियम, स्नो वर्ल्ड, होटल, रेस्टोरेंट, मल्टीप्लेक्स अउ एक्सपीरियंस सेंटर जइसन सुविधा होही।
- कन्वेंशन सेंटर: इहाँ 1500 मनखे के क्षमता वाला एक आधुनिक हॉल बनही, जिहाँ मीटिंग, कॉन्फ्रेंस, बैंक्वेट, रेस्टोरेंट, जिम, अउ स्वीमिंग पूल के सुविधा मिलही।
रोजगार अउ स्थानीय कलाकार मन ला फायदा
छत्तीसगढ़ में पहिली ले 'न्यूटन', 'जहानाबाद', 'द ग्रेट इंडियन मर्डर' अउ 'ग्राम चिकित्सालय' जइसन फिल्म अउ वेब सीरीज मन के शूटिंग हो चुके हे। ए नवा फिल्म सिटी ले हमर राज्य के स्थानीय कलाकार मन, कैमरामैन, अउ तकनीकी काम जाने वाला मनखे मन ला रोज़गार के नवा मऊका मिलही। एखर ले छत्तीसगढ़ के पर्यटन ला घलो राष्ट्रीय अउ अंतरराष्ट्रीय स्तर में एक नवा पहिचान मिलही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।