छत्तीसगढ़ के ‘शिमला’ मैनपाट मा बनही सबो सुविधा ले लैस पर्यटन अउ आवासीय परिसर

छत्तीसगढ़ के प्रमुख पर्यटन स्थल अउ ‘छत्तीसगढ़ के शिमला’ के नाम ले जाने जाथे मैनपाट म पर्यटन अउ रहे-रुके के सुविधा ल बढ़ाए बर एक बड़े कदम उठाए गे हे। मैनपाट क्षेत्र मा जम्मो सुविधा ले लैस, बहुउपयोगी पर्यटन अउ आवासीय परिसर के निर्माण करे जाही, जेखर ले सैलानी मन ल रुके बर नीक सुविधा मिलही अउ इलाका के विकास ल घलो नवा गति मिलही। सरगुजा कलेक्टर ह मैनपाट क्षेत्र मा 12 एकड़ जमीन अटल विहार योजना बर छत्तीसगढ़ गृह निर्माण मंडल ल आबंटित कर दे हे। ए जमीन मा प्रकृति के सुग्घर परिवेश के अनुसार आधुनिक पर्यटन अउ आवासीय परिसर बनाए जाही।

छत्तीसगढ़ गृह निर्माण मंडल के अध्यक्ष श्री अनुराग सिंह देव ह जानकारी देवत बताइस कि ए परियोजना ह जल्दी सुरू करे जाही। एखर मुख्य उद्देश्य मैनपाट आए वाले पर्यटक मन ल गुणवत्तापूर्ण घर, आधुनिक सुविधा अउ सुव्यवस्थित रुके के व्यवस्था देना हे, जेखर ले पर्यटन के काम-काज ल मजबूती मिल सके। उमन बताइस कि ए फैसला ह प्रदेश के यशस्वी मुख्यमंत्री के मार्गदर्शन मा, सरगुजा जिला के प्रभारी मंत्री अउ आवास एवं पर्यावरण मंत्री श्री ओ.पी. चौधरी अउ माननीय पर्यटन मंत्री श्री राजेश अग्रवाल के विशेष प्रयास ले संभव हो पाए हे।

अध्यक्ष श्री सिंह देव ह बताइस कि ए प्रस्तावित परिसर मा केरल के तर्ज मा आधुनिक वेलनेस सेंटर विकसित करे जाही, जिहां पंचकर्म चिकित्सा, हर्बल स्पा अउ आयुष ले जुड़े सुविधा मन मिलही। एखर संगे-संग पर्यटक मन के सुविधा बर 24×7 क्लब हाउस, मिलेट्स कैफे, जिम, स्विमिंग पूल, लइका मन बर प्ले एरिया (Kids Play Area), स्टीम बाथ अउ मनोरंजन जोन (Entertainment Zone) कस आधुनिक सुविधा घलो विकसित करे जाही। पर्यावरण ल बचाए बर ट्री हाउस अउ कॉटेज बनाए जाही, जेखर ले पर्यटक मन मैनपाट के स्थानीय संस्कृति, परंपरा अउ जनजीवन के सीधा अनुभव कर सकही।

ए परियोजना ले मैनपाट क्षेत्र मा पर्यटन ल बड़े बढ़ावा मिलही अउ संगे-संग स्थानीय स्तर मा रोजगार के नवा मौका घलो बनही। कम दर मा अउ बढ़िया आवासीय सुविधा के विकास ले पर्यटक मन के रुके के दिन बाढ़ही, जेखर ले हॉस्पिटैलिटी सेक्टर अउ स्थानीय छोटे-बड़े व्यापारी मन ल मजबूती मिलही। मंत्री श्री ओ.पी. चौधरी ह कहिस कि मैनपाट छत्तीसगढ़ के एक खास पर्यटन स्थल आय। इहां पर्यटक मन के बढ़त संख्या ल देखत हुए आवास, वेलनेस अउ आधुनिक सुविधा के विकास बहुत जरूरी हे। छत्तीसगढ़ गृह निर्माण मंडल के ए परियोजना ह पर्यटन, आवास अउ स्थानीय अर्थव्यवस्था ल नवा दिसा प्रदान करही अउ मैनपाट ल राष्ट्रीय पर्यटन के नक्सा मा मजबूती ले स्थापित करही। मैनपाट मा प्रस्तावित ए परियोजना ह राज्य मा पर्यटन अउ आवास विकास के दिसा मा एक बड़े उपलब्धि साबित होही।