रायपुर बर ये गौरव के बात हे कि एक बार फेर हमर राजधानी अंतरराष्ट्रीय सांस्कृतिक मंच म जगमगाए बर तैयार हे। राष्ट्रीय नाट्य विद्यालय (NSD), नई दिल्ली डहर ले आयोजित दुनिया के सबले बड़े थिएटर फेस्टिवल, 'भारत रंग महोत्सव' (BRM 2026) के अगाज 3 फरवरी ले डीडीयू ऑडिटोरियम म होवत हे।
भारत सरकार के संस्कृति मंत्रालय अउ छत्तीसगढ़ सासन के सहयोग ले होवइया ये छह दिन के महोत्सव म कला प्रेमी मन ला अभिनय, संगीत अउ कहानी के बेजोड़ मेल देखे बर मिलही।
महोत्सव के कार्यक्रम (साँझ 6:30 बजे ले शुरू)
ये महोत्सव के पूरा कार्यक्रम अइसने हे:
- 3 फरवरी: महोत्सव के सुरुआत 'पारो' नाटक ले होही, जेकर निर्देशन शारदा सिंह ह करे हें।
- 4 फरवरी: बंगाली नाटक 'शास्ति' के मंचन करे जाही।
- 5 फरवरी: हिंदी के कालजयी नाटक 'फिर आषाढ़ का एक दिन' दिखाए जाही।
- 6 फरवरी: ये दिन हमर पुरखा रंगकर्मी दिवंगत श्री बंसी कौल ला समर्पित राही, जेम 'सीढ़ी दर सीढ़ी उर्फ तुक्के पे तुक्का' के मंचन होही।
- 7 फरवरी: 'को-जानी कहां?' नाटक के प्रस्तुति होही।
- 8 फरवरी (समापन): आखिरी दिन अंजोर लोक कला मंच' डहर ले छत्तीसगढ़ी भाषा म 'बिरसा' नाटक दिखाए जाही, जेकर माध्यम ले भगवान बिरसा मुंडा ला याद करे जाही।
सब्बो झन ला न्योता: आयोजक मन ह सब्बो कला प्रेमी अउ शहरवासी मन ला ये विश्व स्तरीय उत्सव के गवाह बने बर नेवतई पठोए हें। सब्बो नाटक मन के मंचन रोज साँझ 6:30 बजे ले शुरू होही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।