 |
| Olympic participants from Chhattisgarh will be given Rs 21 lakh. |
ओलंपिक खेल म प्रदेस के स्वर्ण पदक विजेता मन ल तीन करोड़ रुपये, रजत पदक विजेता मन ल दू करोड़ रूपिया अउ कांस्य पदक विजेता मन ल एक करोड़ रूपिया दे जाही
मुख्यमंत्री विष्णु देव साय राजधानी रायपुर के सर्किट हाउस सभागार म आयोजित छत्तीसगढ़ ओलंपिक एसोसिएशन के वार्षिक आम सभा के बइठक म सामिल होइस। ए बखत बइठक म साल 2024-25 के ऑडिट रिपोर्ट के अनुमोदन, साल 2025-26 के वार्षिक बजट प्रस्तुतिकरण अउ अनुमोदन, साल 2025-26 बर ऑडिटर के नियुक्ति सहित आन जरूरी एजेंडा म गोठबात करिन।
छत्तीसगढ़ ओलंपिक एसोसिएशन के अध्यक्ष अउ मुख्यमंत्री विष्णुदेव साय ह कार्यक्रम ल संबोधित करत बड़का घोसना करिस। ओमन किहिन के अब छत्तीसगढ़ ले ओलंपिक म भाग लेवइया मन ल 21 लाख रूपिया के प्रोत्साहन रकम दे जाही। साय ह किहिन के छत्तीसगढ़ म खेल प्रतिभा के कोनो कमी नइ हावय। ये प्रतिभा ल पहचान देवाये अउ निखारे के खातिर हमर सरकार सरलग प्रयासरत हावय। हमन पहिली म बंद खेल अलंकरण समारोह ल फेर सुरू करेन अउ लघियात ही उत्कृष्ट खिलाड़ी सम्मान समारोह तको सुरू करे जाही।
मुख्यमंत्री साय ह किहिन के छत्तीसगढ़ म खेलो इंडिया के नवा परिसर के शुरुआत के गे हावय। कुछ महीना पहिली केंद्रीय खेल मंत्री मनसुख मांडविया के तको छत्तीसगढ़ आगमन होए रिहिस, जिहां हमन उंकर ले खेल अधोसंरचना के विस्तार ल लेके विस्ता्र ले गोठबात करिस। विशेषकर ओलंपिक खेल ल लेके खिलाड़ी मन ल प्रोत्साहित करे बर हमन बिसेस तइयारी करे हावन। ओलंपिक खेल म प्रदेस के स्वर्ण पदक विजेता मन ल तीन करोड़ रुपये, रजत पदक विजेता मन ल दू करोड़ रूपिया अउ कांस्य पदक विजेता मन ल एक करोड़ रूपिया दे के फइसला लिस गे हावय। स्वाभाविक रूप ले येकर ले खिलाड़ी मन के उत्साहवर्धन होही।
मुख्यमंत्री साय ह किहिन के हमर सरकार के प्रयास हावय के खेल के बजट बढ़ाये जाए अउ कॉरपोरेट क्षेत्र के सहभागिता ल तको प्रेरित करे जाए।
मुख्यमंत्री साय ह किहिन के साल 2036 म हमर यशस्वी प्रधानमंत्री नरेंद्र मोदी जी ह ओलंपिक खेल के खातिर भारत के मेजबानी के प्रस्ताव रखे हावय अउ अहमदाबाद शहर ल येकर खातिर प्रस्तावित करे गे हावय। स्वाभाविक रूप ले केंद्र सरकार के पूरा धियान देश म खेल के बेवस्था ल सुदृढ़ करे म हावय, ताकि एक दशक के भीतर हम खेल के क्षेत्र म महाशक्ति के रूप म उभर सकें। इही रकम ले छत्तीसगढ़ म तको हमन ल राष्ट्रीय स्तर के खेल के आयोजन बर समिलहा प्रयास होही।
कैबिनेट मंत्री अउ संघ के उपाध्यक्ष केदार कश्यप ह कार्यक्रम ल संबोधित करत किहिन के मुख्यमंत्री विष्णु देव साय के अगुवई म बस्तर ओलंपिक जइसे खेल प्रतियोगिता के शुरुआत होए हावय, जेकर ले सुदूर वनांचल के खेल प्रतिभा ल एक सुनहरा मंच मिले हावय।
ए मउका म सचिवीय प्रतिवेदन के वाचन महासचिव विक्रम सिसोदिया ह करिन। कार्यक्रम म उपाध्यक्ष हिमांशु द्विवेदी, गजराज पगारिया अउ कोषाध्यक्ष संजय मिश्रा सहित खेल संघ ले जुड़े पदाधिकारी अउ सदस्यगण बड़का संख्या म मौजूद रिहिस।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।