छत्तीसगढ़ी सिनेमा म पहिली सुपर डुपर हिट रंगीन फिल्म मोर छइहा भुइंया के संगीतकार बाबला बागची ह छॉलीवुड एक बड़का नाम आए। ओमन अब कई छत्तीसगढ़ी फिल्म बर लोकप्रिय संगीत के सिरजन करे के बाद अब निर्देशन म कदम बढ़ाये हाबे। बाबला बागची फिल्म एंड ट्रेडस के बैनर तरी बने छत्तीसगढ़ी फिल्म ‘संगी रे लहुंट के आजा’ म ओमन के पहिली पइत निर्देशन के कमाल देखे बर मिलही, वइसे ओमन ए फिल्म के पटकथा लेखक अउ संगीतकार तको हावय।
मिले आरो के मुताबिक पाछू दिन ‘संगी रे लहुंट के आजा’ के पोस्टर के विमोचन छत्तीसगढ़ी सिनेमा के भीष्म पितामह कहे जाने वाले महान फिल्ममेकर सतीश जैन के हाथ ले सतीश जैन प्रोड्क्शन ऑफिस भाठागांव रायपुर म करे गिस। जानबा होवय के बाबला बागची ह हुआ सतीश जैन ल अपन गुरू मानथे।
ये मउका म ‘संगी रे लहुंट के आजा’ फिल्म ले जुरे लोगन मन जुरियाए रिहिन जेमा सतीश जैन, बाबला बागची, प्रकाश अवस्थी, पुष्पेंद्र सिंह, योगेश अग्रवाल, पूरन किरी, क्रांति दीक्षित, मयंक रायकर, नितेश झा अउ सुशांत शर्मा के उपस्थिति खास रिहिस।
बताये जाथे के ‘संगी रे लहुंट के आजा’ फिल्म बेहतरीन गीत संगीत ले सजे पारिवारिक लव स्टोरी, एक्शन, ड्रामा कॉमेडी ले भरपूर मजेदार हावय जेन दर्शक मनला गजब पसंद आही। फिल्म के निर्देशन करे हाबे बाबला बागची अउ निर्माता हे सुनील गर्ग (पिंटू)।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।