- रायपुर के साइंस कॉलेज मैदान म 14 अउ 15 नवंबर ल होही राज्य स्तरीय आयोजन
- आदि लोक नृत्य नाटिका, भील भगोरिया नृत्य, गारो अउ आओ नागा सहित होही आने-आने प्रस्तुति
मुख्यमंत्री विष्णु देव साय के मार्गदर्शन म छत्तीसगढ़ के राजधानी रायपुर के साइंस कॉलेज मैदान म 14 अउ 15 नवंबर ल भगवान बिरसा मुंडा के जयंती-जनजातीय गौरव दिवस म राज्य स्तरीय बड़का आयोजन करे जाही। दू दिवसीय आयोजित ए कार्यक्रम म छत्तीसगढ़ सहित 17 राज्य के आदिवासी नर्तक दल मनमोहक प्रस्तुति दिही। एमे अरूणाचल प्रदेस के आदि लोक नृत्य नाटिका, मध्यप्रदेश के भील भगोरिया नृत्य, मेघालय के गारो लोक नृत्य अउ नागालैण्ड के आओ नागा लोक नृत्य सहित आने-आने आकर्षक प्रस्तुति होही।
जानबा होवय के प्रधानमंत्री नरेन्द्र मोदी 15 नवंबर ल जमुई (बिहार) ले जनजाति गौरव दिन के सुरू करही। वो छत्तीसगढ़ म आयोजित कार्यक्रम म वर्चुअली सामिल होही अउ पीएम जनमन योजना म सामिल जिला के हितग्राही मन ले गोठबात तको करही। मुख्यमंत्री विष्णु देव साय के पहल म राज्य के सबो जिला मुख्यालय म तको एक दिवसीय गौरव दिवस के आयोजन करे जाही।
आदिम जाति विभाग डहर ले येकर तइयारी करे जात हावयं। साइंस कॉलेज मैदान म जनजाति गौरव दिवस के बखत 14 अउ 15 नवंबर ल मंझनिया 11 बजे ले लेके रतिहा 8 बजे तक जनजाति गौरव म आधारित विविध कार्यक्रम के आयोजन होही, जेमा विषय विशेषज्ञ सहित कई राज्य के आदिवासी कलाकार, आदिवासी कला संस्कृति के मर्मज्ञ सामिल होही।
दो दिवसीय राज्य स्तरीय जनजाति गौरव दिवस के आयोजन ल बड़का अउ यादगार बनाये के खातिर आदिम जाति कल्याण विभाग डहर ले देश के आने-आने राज्य ले आदिवासी नर्तक दल अउ कलाकार मन ल बिसेस रूप ले नेवताए हावय। अब तक 18 राज्य के 22 आदिवासी नर्तक दल ह ए दू दिवसीय आयोजन म सामिल होए के खातिर अपन सहमति दे हावय, जेमा अरूणांचल प्रदेश, मिजोरम, नागालैण्ड, मेघालय, आसाम, त्रिपुरा, उत्तराखण्ड, तेलंगाना, उत्तर प्रदेश, महाराष्ट्र, गुजरात, कर्नाटक, छत्तीसगढ़, मध्यप्रदेश, राजस्थान सहित आन राज्य के आदिवासी नर्तक दल सामिल हावयं। एमे पुरूष अउ महिला कलाकार मन के संख्या लगभग 425 हावय।
प्रमुख सचिव सोनमणि बोरा ह बताइन के 14 नवंबर अउ 15 नवंबर ल साइंस कॉलेज मैदान म संझा 3 बजे ले अंतर्राज्यीय लोक नर्तक दल के सांस्कृतिक कार्यक्रम के प्रस्तुति के संग जनजाति गौरव ले संबंधित विषय म संगोष्ठी के आयोजन अउ जनजाति जिनगी शैली म चित्रकला के प्रदर्शन तको होही।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।