छत्तीसगढ़ राज्यभाषा आयोग डहर ले मंत्रालय महानदी भवन म तीन दिवसीय छत्तीसगढ़ी प्रशिक्षण कार्यक्रम

अंजोर.रायपुर,ए। छत्तीसगढ़ राज्यभाषा आयोग डहर ले मंत्रालय महानदी भवन म राज्य के अधिकारी-कर्मचारी मन खातिर तीन दिवसीय छत्तीसगढ़ी प्रशिक्षण कार्यक्रम 26 ले 28 फरवरी तक आयोजित करे जात हावय।

जानबा होवय के छत्तीसगढ़ राज्यभाषा आयोग के सचिव डॉ. अनिल कुमार भतपहरी ह पाछू पांच बछर ले बिगर अध्यक्ष के आयोग ल अपन सूझबूझ ले बढि़या ढंग ले चलावत हाबे। पाछू सरकार ह आयोग म अध्यक्ष के नियुक्ति नइ करिस। डॉ. अनिल कुमार भतपहरी ल पदेन सचिव के जिम्मेदारी ल निभावत केऊ बड़का आयोजन ल ऐतिहासिक रूप ल सफल बनाइस। ओमन के आयोजन म न सिरिफ महानगर के साहित्यकार बल्कि दूर दराज के नवा कलमकार मन तको पहिली पंक्ति म आगे गरब महसूस करिस। सबो समाज के मनखे मनला बरोबर मउका देवत छत्तीसगढ़ी लिखे, पढ़े, बोले बर प्रोत्साहित करिन।

ओमन छत्तीसगढ़ी ल कामकाज के भाषा बनाये कोति रमे हाबे अउ सरलग प्रशिक्षण कार्यक्रम चलावत हाबे। इही ओढ़र म मंत्रालय महानदी भवन म तीन दिवसीय कार्यक्रम चलाये जात हाबे। मिले आरो के मुताबिक प्रशिक्षण के पहिली दिन लगभग 130 मंत्रालयीन कर्मचारी मन ह प्रशिक्षण के फायदा लिस। जेमा छत्तीसगढ़ के बड़का साहित्यविद् अउ लेखक डॉक्टर चितरंजन कर ह अपन व्याख्यान दीस अउ छत्तीसगढ़ी राजभाषा के प्रशासनिक उपयोग के खातिर कर्मचारी मन ल प्रोत्साहित करिन।

प्रशिक्षण के दूसरइया दिन लोक व्यवहार अउ प्रशासनिक बुता म छत्तीसगढ़ी के उपयोग अउ शब्दावली के प्रशिक्षण दे गिस। जेमा विशेषज्ञ के रूप म शिक्षाविद् डॉ. सुधीर शर्मा रिहिन। प्रशिक्षण के आखरी दिन अनुभाग अधिकारी अउ अवर सचिव स्तर के अधिकारी मनला प्रशिक्षण देही। प्रशिक्षण कार्यक्रम म मंत्रालयीन कर्मचारी संघ के अध्यक्ष महेन्द्र सिंह राजपूत सहयोग देत हावय।