बेहतर स्वास्थ्य खातिर कलेक्टर तारन प्रकाश सिन्हा मेडिकल कॉलेज के औचक निरीक्षण करिस

बेहतर स्वास्थ्य खातिर कलेक्टर तारन प्रकाश सिन्हा मेडिकल कॉलेज के औचक निरीक्षण करिस

अंजोर.रायगढ़। जिला म पदस्थापना के संग ही कलेक्टर तारन प्रकाश सिन्हा ह स्वास्थ्य सुविधा के बेहतरी के खातिर प्रयास सुरू कर दे हावयं। येकर शुरुआत आज ओमन मेडिकल कॉलेज अउ मातृ शिशु अस्पताल के औचक निरीक्षण ले करिस। कलेक्टर सिन्हा ह इहां मेडिकल कॉलेज प्रबंधन अउ जिला स्वास्थ्य विभाग ले किहिन के हमन ल जिला म बढि़या स्वास्थ्य सुविधा लोगन ल मुहैय्या कराना हावय। येकर खातिर सबो ल एक टीम के रकम ले मिलके बुता करना होही। जेकर ले सुविधा बढि़या हो अउ आम जनता ल ओकर लाभ मिले।

कलेक्टर सिन्हा ह स्वास्थ्य विभाग अउ पीडब्ल्यूडी के  अधिकारी मनके संग मेडिकल कॉलेज के निरीक्षण करिन। सीईओ जिला पंचायत अबिनाश मिश्रा तको संग रिहिन। कलेक्टर सिन्हा ह मेडिकल कॉलेज बिल्डिंग म आने-आने वार्ड के निरीक्षण करिन अउ मेडिकल कॉलेज सुपरिटेंडेंट डॉ मिंज ले अस्पताल संचालन ले जुड़े मैन पावर अउ संसाधन के संग दूसरी तमाम जानकारी विस्तार ले लिस। इहां पुलिस विभाग डहर ले मदद केन्द्र खोले गे हावय, ओमा सरलग रूप ले जवान मनके तैनाती के निर्देश ओमन एडिशनल एसपी के दिस। ओमन अस्पताल म पानी के समुचित बेवस्था करे के निर्देश दिस। स्पेशलिस्ट डॉक्टर्स के संग मैन पावर अउ तकनीकी स्टॉफ के उपलब्धता के जानकारी लेवत मेडिकल कालेज प्रबंधन अउ जिला स्वास्थ्य विभाग के जरूरी भरती के खातिर प्रस्ताव तइयार करे के निर्देश दिस। जेकर ले भरती कार्यवाही आगू बढ़ाये जा सके। ओमन अगले सप्ताह स्वास्थ्य विभाग के समिलहा बइठक लेके आगू के कार्ययोजना तइयार करे के बात कहिन। ए बखत अस्पताल अधीक्षक डॉ.मनोज मिंज, डॉ.लकड़ा, सीएमएचओ डॉ.मधुलिका सिंह ठाकुर, ईई पीडब्ल्यूडी आर.के.खाम्बरा सहित मेडिकल कालेज प्रबंधन के अधिकारी-कर्मचारी उपस्थित रिहिन।

परिसर म बनही परिजन निवास

मेडिकल कालेज अस्पताल म बड़का संख्या म मरीज इलाज कराइन पहुंचते हावय जेकर देखरेख के खातिर परिजन तको संग होवत हावय। उंकर रूके अउ भोजन के बेवस्था के संबंध म कलेक्टर सिन्हा ह किहिन के अस्पताल परिसर म परिजन निवास, किचन शेड अउ सुलभ शौचालय बनवाया जाही, येकर खातिर ओमन प्रस्ताव तइयार करके जल्दी  दे के निर्देश दिस।

पोषण पुनर्वास केन्द्र के सबो बेड भरे होना चाही

कलेक्टर सिन्हा ह मेडिकल कालेज अस्पताल के पाछु मातृ अउ शिशु अस्पताल के तको निरीक्षण करिन। इहां ओमन सबो फ्लोर म जाके बेवस्था के देखे अउ रोज अस्पताल म आने वाला मरीज अउ जचकी के बारे म जानकारी लिस। ओमन अस्पताल म संचालित पोषण पुनर्वास केन्द्र के तको जायजा लिस। इहां लइका ल दे जाये वाला खुराक अउ आन सुविधा के जानकारी स्टॉफ ले लिस। ओमन पोषण पुनर्वास केन्द्र म सबो बेड भरे होना चाही। येकर खातिर स्वास्थ्य अउ महिला अउ बाल विकास विभाग आपस म समन्वय ले बुता करें। जेकर ले कुपोषित लइका ल उचित इलाज के सुविधा मिल सके।