सिविल अस्पताल नगरी के नामकरण अब स्वतंत्रता संग्राम सेनानी श्याम लाल सोम के नाम म करिस महिला, बाल विकास अउ समाज कल्याण मंत्री श्रीमती अनिला भेंड़िया

सिविल अस्पताल नगरी के नामकरण अब स्वतंत्रता संग्राम सेनानी श्याम लाल सोम के नाम

अंजोर.धमतरी। महिला, बाल विकास अउ समाज कल्याण मंत्री श्रीमती अनिला भेंड़िया ह सिविल अस्पताल नगरी के नामकरण अउ स्वतंत्रता संग्राम सेनानी परिवार सम्मान कार्यक्रम म सामिल होइसं अउ धमतरी जिला के नगरी क्षेत्रवासी मनके बहुप्रतीक्षित मांग ल पूरा करत स्वतंत्रता संग्राम सेनानी स्वर्गीय श्यामलाल सोम के नाम म सिविल अस्पताल नगरी ल नामकरण करिन। ए बखत ओमन स्व. श्यामलाल सोम के बड़े लीलाशंकर सोम सहित अऊ 20 स्वतंत्रता संग्राम सेनानी परिवार ल शॉल अउ श्रीफल ले सम्मानित करिन। कार्यक्रम के अध्यक्षता सिहावा विधायक अउ मध्यक्षेत्र आदिवासी विकास प्राधिकरण के उपाध्यक्ष डॉ. लक्ष्मी ध्रुव ह करिस। ए मउका म पहिली विधायक श्रीमती अंबिका मरकाम सहित कई जनप्रतिनिधि जुरियाए रिहिन।

जानबा होवय के स्वतंत्रता संग्राम सेनानी श्यामलाल सोम के जनम 05 जनवरी 1907 के होए रिहिस। क्षेत्र के आन सेनानी के संग सोम ह तको आजादी के आंदोलन म भाग ले रिहिस। वो ह राष्ट्रपिता महात्मा गांधी ले प्रभावित होके बीटीआई के पढ़ाई छोड़ जंगल सत्याग्रह म सामिल होइस। येकर बाद ओमन रूद्री-नवागांव म जंगल सत्याग्रह के अगुवई करिन।  आजादी मिले के बाद आने-आने मउका म श्यामलाल सोम के सम्मान होइस। स्वतंत्रता के 25 वीं वर्षगांठ म तत्कालीन प्रधानमंत्री श्रीमती इंदिरा गांधी ह ओला ताम्रपत्र ले सम्मानित करिन।