अंजोर.रायपुर। मुख्यमंत्री भूपेश बघेल ह किहिन के गउठान डहर ले खुद के जमा पूंजी ले गोबर खरीदना गोधन न्याय योजना के बड़े सफलता हावय। प्रदेस के ग्रामीण क्षेत्र के आधा ले जादा गउठान स्वयं के संसाधन ले गोबर के खरीदी करत हावयं। राज्य शासन ल ये गउठान के गोबर खरीदे के खातिर रकम दे के जरूरत नइ पड़त हावय। गोधन न्याय योजना के तहत राज्य म हितग्राही मन के 376 करोड़ 50 लाख रूपिया के भुगतान करे जा चुके हावय। योजनांतर्गत कोरिया जिला म विकासखण्ड बैकुण्ठपुर के मझगंवा गउठान के प्रगति महिला समूह के 03 महिला मन बाड़ी के बुता करके अपन आर्थिक स्थिति के सुदृढ करत हावयं। संग ही आन महिला मन के खातिर तको प्रेरणास्रोत बने हावयं।
समूह के अध्यक्ष शमशुन निशा बतान के समूह के गठन ले वो गउठान म आने-आने गतिविधी ले जुड़के बुता करत हावयं। ओमन बताइन के अभी के बेरा म समूह म 10 सदस्य हावयं, जेमे ले 03 महिला सदस्य मन के डहर ले बाड़ी विकास के बुता करे जात हावय। समूह के सचिव अंजुलता ह बताइन के हम पहिली ही घर म छोटे स्तर म जरूरत मुताबिक सब्जी लगात रेहेन, अउ जब गउठान म बड़े पैमाने म समूह के महिला मनके संग मिलके काम करे के मउका मिले त पहिली के प्रैक्टिस ले ये काम अउ आसान होगे।
ओमन बताइन के पाछु 5 महीना ले हम बाड़ी विकास के बुता करत हावन। 25 हजार के लागत ले बाड़ी विकास के काम सुरू करिन। अभी के बेरा म इहां मटर, बैगन, मूली, आलू अउ भाजी लगाए हावयं। जेकर बेचे करके महिला मन के 45 हजार रूपिया तक के शुद्ध लाभ होइस अउ सरलग मुनाफा बढ़त हावय। स्थानीय बाज़ार म ही सब्जी के खपत हो जात हावय। महिला मन कहत हावयं के जब ले हम ये बुता करत हावन अच्छा आमदनी ले आर्थिक रूप ले सशक्त होके घर-परिवार के ज़रूरत ल पूरा करत हावयं।
सबो पाठक ल जोहार..,
हमर बेवसाइट म ठेठ छत्तीसगढ़ी के बजाए रइपुरिहा भासा के उपयोग करे हाबन, जेकर ल आन मन तको हमर भाखा ल आसानी ले समझ सके...
छत्तीसगढ़ी म समाचार परोसे के ये उदीम कइसे लागिस, अपन बिचार जरूर लिखव।
महतारी भाखा के सम्मान म- पढ़बो, लिखबो, बोलबो अउ बगराबोन छत्तीसगढ़ी।