धान बेचे म किसान मनजा कोनो दिक्कत झिन होवे : मुख्यमंत्री भूपेश बघेल.., अंजोर छत्तीसगढ़ी म पढ़व पूरा खबर

अंजोर.रायपुर। मुख्यमंत्री भूपेश बघेल ह खरीफ विपणन साल 2022-23 के खातिर समर्थन कीमत धान म खरीदी ल लेके पूरा तइयारी रखे के निर्देश सबो जिला कलेक्टर मन ल दे हावयं। मुख्यमंत्री ह साफ रूप ले किहिन के, धान बेचे म किसान मन के कोनो तको रकम ले परेशानी नइ होना चाही। मुख्यमंत्री बघेल ह राजधानी रायपुर म आयोजित दू दिवसीय कलेक्टर-एसपी कॉन्फ्रेंस के संबोधित करत किहिन। ओमन कानून-व्यवस्था समेत प्रदेस म धान खरीदी तइयारी अउ आने-आने सरकारी योजना मन के क्रियान्वयन के समीक्षा तको करिस।

कलेक्टर-एसपी कॉन्फ्रेंस के पहिली दिन मुख्यमंत्री बघेल ह खरीफ विपणन साल 2022-23 के खातिर धान खरीदी के लेके जिला स्तर म तइयारी म जिला कलेक्टर ले सोज बात करिस। ए बखत ओमन निर्देशित करत होइस किहिन के, प्रदेस म नवम्बर ले धान खरीदी सुरू होवइया हावय, ए लिहाज ले पूरा तइयारी रखें। जानबा होवय के मुख्यमंत्री बघेल के घोसना के मुताबिक छत्तीसगढ़ राज्य म 1 नवंबर ले धान खरीदी सुरू कर दे जाही। खरीफ विपणन साल 2022-23 के खातिर समर्थन कीमत म धान खरीदी के लक्ष्य 1 करोड़ 10 लाख मीट्रिक टन करार करे गे हावय। अइसे म धान केन्द्र केन्द्र म जरूरी बेवस्था अउ सुविधा समेत प्राथमिकता के संग बारदाना के उपलब्धता म जोर दे गिस।