बरबटी-तोरई-लौकी बेचे ले लखपति बनत लक्ष्मी स्व सहायता समूह के महिला, बाड़ी विकास योजना खोलिस आर्थिक उन्नति के दुवार

अंजोर.कोरिया। शासन के नरवा, गरुवा, घुरवा अउ बाड़ी योजना ले ग्रामीण परिवेश म जीवन यापन करइया ल अच्छा लाभ होवत हाबे। योजनांतर्गत बाड़ी विकास कार्यक्रम ह कोरिया जिला के किसान मन सहित स्वसहायता समूह के महिला मन के तको आर्थिक उन्नति के तनि अग्रसर करे म महती भूमिका निभाये  हावय। विकासखण्ड भरतपुर के कासीटोला गउठान के लक्ष्मी स्व सहायता समूह के महिला मन बाड़ी विकास कार्यक्रम ले जुड़के सप्ताह म 5 ले 6 हजार रूपिया के अकताहा आमदनी कमात हावयं, जेकर ले अब तक ओला कुल 1 लाख रूपिया तक के आय होए हावय।

समूह के अध्यक्ष श्रीमती बाबी यादव बताती पहिली समूह के महिला मन घरेलु जरूरत  के मुताबिक सब्जी के उत्पादन करत रिहिसं, फेर जब ले हमन ल शासन के बाड़ी विकास कार्यक्रम के बारे म जानकारी मिले हमन मिलके गउठान म सब्जी उत्पादन के आर्थिक गतिविधी के रूप म चुनेन। सचिव श्रीमती फुलमती यादव ह बताइन के जिला प्रशासन के मार्गदर्शन अउ उद्यानिकी विभाग के सहयोग ले बाड़ी म एक एकड़ म ड्रीप इरिगेशन सिस्टम स्थापित करे गिस, जेकर ले तकनीकी रूप ले सब्जी उत्पादन करे जात हावय अभी बाड़ी म बरबटी, तोरई, लौकी लगाए गे हावयं। महिला मन डहर ले स्थानीय साप्ताहिक बाजार के संग ही बहरासी के प्राथमिक अउ माध्यमिक स्कूल  अउ छात्रावास म तको बेचे बर सब्जी भेजी जा रहीं हावय। अकताहा आर्थिक लाभ मिले होए ले समूह के महिला मन आज बहुत खुश हावयं।